-Қазір Астанадағы Иманов  көшесінде «ужас» фильм түсіреміз...

Астана туралы қорқынышты фильм түсірген жүргізушілер бүгін тізеден су кешкен телеоператорлармен жағаласып жүр. Себебі Есілдің сол жағалауында ондаған көлік қайық сияқты жүзіп кетті. Су машинаның ішіне дейін кірген.

-Міне , салонға дейін көлкіген су...

Көліктерін итеріп шығара алмаған жүргізушілердің әбден жүйкесі жұқарған. Бұзылып топан судың ортасында қалған мұндай темір тұлпарларды қаланың кез-келген ауданынан кездестіресің. Жағдайдың ушыққаны соншалық, полицейлер бірнеше көшедегі қозғалысты тоқтатуға мәжбүр болды.

-«Жастар» ауданымен жүзіп келеміз...

Жаңбыр суы көшелердегі қозғалысты ғана емес, жер үйлердің тұрғындарын да есінен тандырды. Айнала көлшікке айналып, су аулаларға дейін кірген. Бұл ауданға бюджеттің миллондаған теңгесіне тақтайдай тегіс жол төселгенімен, шенеуніктер арық салуды ұмытып кетіпті. Енді оның зардабын жүздеген отбасы тартып отыр.

Динара Іргебаева, Астана қаласының тұрғыны:

-Осы жолды жылына 3-4 рет жөндейді. Бұл біреулерге тиімді-ау деймін ақша қымқыруға...

Жеке сектор ғана емес, мемлекеттік бағдарламамен салынған үйлердің іші де астан-естен. Төбеден су ағып, жаңадан жөндеу жасалған пәтерлердің бәрін бүлдірген.

-Сылақтары түсіп, кірпіштері ырсиып тұр.

Осылайша нөсерден көтерілген қызыл су, ағатын арық таппай Астананы нағыз Венецияға айналдырып жіберді. Коммуналдық қызмет 24 сағат жұмыс істегенімен ағын суды сорып үлгере алмай жатыр. Ал Елорда әкімдігі жаңбырға барынша төтеп беріп жатқандарын айтады. Бірақ, кәріз жүйесінің су өткізу деңгейінің төмендегі қиындық туғызады екен.

Қосман Айтмұханбетов, Астана қаласы әкімінің орынбасары:

-Мына тазарту құрылғысы Сол жағалауға толық қызмет ете алады. Қазір жылжымалы үлкен су сорғыштардың көмегімен көшедегі суды тазартып жатырмыз.  Жыл соңына дейін тағы бір тазарту қондырғысын іске қосу жоспарда бар.

Бір жауып, бір тоқтап тұрған нөсер алдағы екі күнде әлі де әбіргерге салмақ. Өйткені, сенбі мен жексенбі де жаңбырлы болады дейді синоптиктер.  

Жаңбыр жауса сынның астында қалатын Астана әкімдігі қазір арық қазуға дереу кірісті. Суағалардың құрылысы әзірше, Есілдің сол жағалауынан басталып жатыр. Бюджеттің 10 миллиард теңгесі жұмсалатын кәріз жүйесі алдымен «ЭКСПО» қалашығына дейін тартылады. Көрмеге келетін шетелдік қонақтарды қайықпен жүзіп кетпесін десе, әкім Әсет Исекешовтың командасына әлі біраз тер төгуге тура келеді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!