Павлодардың көшелерінде жосып жүрген елік жұрттың таңданысын тудырды
Павлодардың орталық көшелерінде жосып жүрген елік жұрттың таңданысын тудырды. Жабайы жануарды алғаш боп жергілікті университет студенттері білім мекемесінің аумағынан аңғарған.
Автор: Әйгерім Шакаманова
02.09.2016
Ал елікті ұстау үшін орманшылардың біраз тер төгуіне тура келді. Адамнан үркіп қашқан аң ақыры темір қоршауға ілініп, жарақаттанған. Көше кезген бұл жануар – еліктің бір жасар лағы екен. Қазір ол ветеринарлардың бақылауында. Тиісті ем-дом жасалған соң табиғат аясына жіберілмек. Ал орманшылар жабайы елікті біреу үйінде заңсыз ұстаған деген болжам жасады.
Аждар Жүсіпов, Павлодар қаласы орман және жануарларды қорғау мемлекеттік мекемесінің директоры:
– Лақты біреу үйінде ұстаған. Заң бойынша жабайы аңды қамауда ұстап, қиянат жасағандар жауапқа тартылуы тиіс. Бірақ мұнымен енді полиция айналысады.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
