Жамбыл ауданының 3 балабақшаға жәутеңдеп жүргені кеше ғана. Ал бүгінде мұндағы бөбекжайлар саны 50-ге жуықтапты. Жаңадан бой көтерген мекемелердің басым бөлігі жекенің женшігінде. Дегенмен, ата-аналар да, білім берушілер де мұндай балабақшалардың мемлекеттіктен аса айырмашылығы жоқтығын айтады.

Ләйләш Бәкірова, Жамбыл аудандық білім бөлімінің басшысы:

- Балаларға тәрбие жағынан бұлардың айырмашылығы жоқ. Тек қана төлем ақшасы бізде 4-5 мың ғана айырмашылығы бар.

Бірнеше жыл бұрын бөбекжайлардағы орынның жоқтығынан тұрғындар жылдап кезекте тұратын. Міне, енді аудандағы өзекті мәселе жаңа балабақшалар есебінен шешімін тауып отыр.

Бақытгүл Жалкеева, Ұзынағаш ауылының тұрғыны:

-Бұрындары баламызды балабақшаға өткізейік десек, жасынан өтіп кететін тұғын. Балабақшада кезек өте ұзақ болатұғын. Қазір еш қиындығы жоқ. Балабақша өте-өте көп ашылып жатыр.

Бұған дейін ата-аналары жаппай наразылық білдірген Қарғалы ауылындағы 3 ауысыммен оқитын мектеп мәселесін де шешетін күн алыс емес деп сендіріп отыр басшылар. Яғни білім ошағына оқушылар сыймағандықтан, онда қосымша ғимарат салынбақшы.

Ләйләш Бәкірова, Жамбыл аудандық білім бөлімінің басшысы:

- Жергілікті бюджеттен 100 миллион теңге бөлініп отыр. Келесі жылы ол мектептің қосымша ғимараты пайдалануға берілсе, ол мектепте де біз 3 ауысымдық мәселесін жоямыз.

Қазір ауданда орынның тапшылығынан 5 мектеп 3 ауысыммен оқуға мәжбүр. Дегенмен, күрделі мәселені шешу үшін де біраз шаруа атқарылып жатқан көрінеді. Яғни ауданда су жаңа білім ошақтары бой көтеруде.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!