Алматыда аурухананы басына көтерген шатақ әжейдің туыстары іздестіріліп жатыр
Дәрігерлердің мазасын қашырған кейуана! Алматыда ақ халаттылар жасы жүзге жуықтаған әжейдің жақындарын іздестіріп жатыр. Өзін Мейіз Бәкібаева деп таныстырған ол емге мұқтаж болмаса да, 2 аптадан бері ауруханада жатыр. Себебі, кейуананы тірі жан іздеп келмеген. Ал әжейдің өзі дәрігерлерді балағаттап, ерсі әрекеттерімен мезі етіпті.
Автор: Нұргүл Нұрланқызы
16.09.2016
Бұл – 2 аптадан бері аурухана изоляторын мекен еткен кейуана. Мұнда далада қаңғып жүрген жерінен жедел жәрдеммен жеткізілген. Тек тиісті ем-домын жасап болған соң, дәрігерлер оны қайда жіберерін білмей отыр. Өйткені, ешкім іздеп келмеген. Шатақ әжейдің өзі де жөн-жосығын ашып айтар емес.
Мейіз Бәкібаева:
- Іздей ме, іздемей ме ол сенің шаруаң емес, кет әйдә, бар! Менің туысқанымда шаруаң болмасын! Менің келер-кетерімде шаруаң болмасын! Былшылдамай шық.
Кейуана келген адамның бәрімен осылай сөйлеседі. Әсіресе, дәрігерлер оның балағат сөздері мен ерсі әрекеттерінен әбден мезі болған.
Әнел Тұрсынова, невропатолог:
- Бәдік сөйлейді. Қолындағы заттарын лақтырады. Түкіреді бетке. Біздің жұмысқа кедергі келтіреді. Полиция арқылы туыстарын іздеп көрдік. Бірақ таппадық.
Жасы бір ғасырға жуықтаса да, Мейіз әжей қуатты. Сөз арасында ақ халаттыларға бала-шағасы барын айтыпты. Бірақ, олардың аты-жөнін жария етуден түбегейлі бас тартып отыр. Тіпті кейуана өзінің үйін табуға қол ұшын беруге келген полицейлерді де жерден алып, жерге салды.
-Балаларыңыз бар ма?!
-Оны қайтесің?!
-Он балам бар, қолдары мынадай мынадай!
-Фамилия, аты-жөні керек балаларыңыздың.
-Фамилиясында шаруаң болмасын.
Қария айтқан мекен-жайлар да қате болып шығыпты. Өзі ауруханадан кетем деп күнде қиғылық салады. Барар жері болмаған соң дәрігерлер де оны амалдың жоқтығынан ұстап отыр. Бірақ бала-шағасы жақын арада табылмаса, Мейіз Бәкібаева әлеуметтік бейімдеу орталығына жөнелтілмек.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
