Пәтер толы ойыншықтар енді иесіз қалды. Олармен ойнайтын Эвелина 2 күн бұрын жер қойнына тапсырылған. Ал күні кеше мектеп табалдырығын аттаған жалғыз қызының өліміне анасы әлі сене алмай жүр. Себебі, перзенті  бұған дейін қатерлі дертпен ауырған емес. Тек бір апта бұрын ыстығы көтеріліп, іші ауыра бастапты.

Иоланта Янушене, Эвелина Янушайтенің анасы:

- Мазасы кете бастаған соң ауруханаға өзім апардым. Дәрігерлер соқырішегін тексерді. Сөйтіп, ол жері дұрыс деп, жұқпалы аурулар ауруханасына жіберді. Ондағы мамандар қызымның тамақ безі ісінгенін мәлімдеді. Сөйтіп, ангинаның емін үйде қабылдай бастадық.

Алайда Эвелинаның тамағы емес, іші ауыра беріпті. Ал 3 күн бұрын жағдайы тіптен нашарлап, жедел жәрдеммен ауруханаға жеткізілген. Сөйтіп, дәрігерлер тағы да соқырішек болған деп, науқас қыз бірден пышаққа түсіпті. Тек 4 сағаттан кейін өлі денесі қайтарылған. Енді операция үстінде көз жұмған қыздың анасы болған жағдайға дәрігерлерді кінәлап отыр.

Иоланта Янушене, Эвелина Янушайтенің анасы:

- Негізі отаның жетінші минутында көз жұмған. Ал дәрігерлер қаралы хабарды 4 сағаттан кейін жеткізді. Осы уақыт бойы қателіктерін жабуға тырысқаны анық. Себебі, олар ота алдында қызымның ағзасын тексерген жоқ. Менің ойымша, қызым артық мөлшердегі наркоздан немесе салынған дәрі-дәрмектерге аллергиядан көз жұмды.

Ота соқырішекке жасалғанымен, соңында науқастың өкпесі қабынған болып шыққан. Дегенмен, дәрігерлер өздерінен ешқандай ағаттық кетпегенін мәлімдеді.

Николай Дьяченко, Алматы қаласы №1 балалар клиникасы бас дәрігерінің орынбасары:

- Мамандар дұрыс диагноз қойған. Науқастың іш қуысы қатты ауырғанда біз ота арқылы, себебін анықтауға міндеттіміз. Науқастың неден көз жұмғанын мәйітке жасалған зерттеу көрсетеді. Соны күтейік.

Ал қара жамылған әйел перзентін ауруханаға апарғаны үшін өкініп қалған. Дәрігерлерден көңілі қалған ол енді шындыққа қол жеткізбек. Сондықтан Эвелинаның өліміне кінәлілерді жазалау үшін прокуратураға шағымданбақ. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!