Сартай батырдың рөлін ойнап, бар қазақтың көңілінен шыққан Асылхан Төлеповтің негізі тауда жүгіретін әдеті жоқ. Спортпен ол кинода ғана шұғылданады. Бұл жолы актер алдағы Универсиадаға жұртты ерікті болуға үндеп жүр.      

-Сіздерді де біздің қатарымызға қосылуға шақырамыз! Универсиаданың сәтті өтуі біздер мен сіздер қосқан үлестерімізге байланысты!

Еріктілерді жинау қазір осы жарнамаға байланысты болып тұр. Өйткені, сырттан келетін спортшы және басқа да қонақтарға тегін қызмет көрсетуге алматылықтар аса ықылас таныта қоймаған. Қажетті 3 мың адамның орнына әзірге 600 студент жазылыпты. Еріктілерді елден таба алмай, шетелдіктерді шақыртып жатқан ұйымдастырушылар «Универсиаданың басталуына әлі уақыт бар» деп арқаны кеңге салып отыр.    

Абылай Қондыбаев, «Универсиада-2017» дирекциясы еріктілермен жұмыс департаментінің басшысы:

-Уақыт бар әлі, 4 айға жуық. Белсене жұмысты Алматы қаласы бойынша қыркүйек айының соңында бастаймыз. Өйткені, олар қыркүйекте келді. Қазір оқуларында болып жатыр. Осы айдың соңында өте тығыз жұмыс жасаймыз деген ойдамыз.

Қазір сырттан келетін қонақтарды қарсы алуға тек ғимараттар дайын. Оның өзінде, тоқ сымдарын тартып, жан-жағына асфальт салу секілді жұмыстары бар. Ал алдағы спорттық додаға дайындықты уайымдап елге келген Ұлыбритания мен АҚШ өкілдеріне шенеуніктер алдымен емдеу мекемелерін көрсетіп мақтанды.       

Манат Сейдуманов, Алматы қалалық №4 ауруханасының бас дәрігері:

-Шетелдіктер де айтып отыр. Дәрігерлердің дайындығы ешқандай ешкімнен кем емес деп.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!