Элеонора емізулі баласымен еменнің астында қалып қойған. Алып ағаш ол көлігіне отыра бергенде құлапты. Оқиға қалалық саябақтың ішінде болса да, әкімдіктегілер айдаладағы мейрамхананы кінәлаған.       

Элеонора Пак:

-Бізге әкімдіктегілер «жауап бермейміз, талдың құлағанына мейрамхана жауапты, өйткені сіздің көлігіңіз солардың тұрағында болған» деп басын ала қашты.

Ал көліктің сау-тамтығы қалмаған. Тірі қалғанына әйелдің өзі аң-таң. Ал періштесі қаққан сәбиге бірнеше ота жасалыпты. Десе де, ауыр жарақаттарға қарамастан қозғалған қылмыстық іс ертесіне-ақ жабылған. Өйткені, еменнің иесі сол күйі табылмай, аяғында ағаштың өзі кінәлі боп шыққан.    

Мөлдір де – ажалдан аман қалғандардың бірі. Студенттің басына ағаш сабақтан шыға бергенде сұлаған. Алайда, Алматыдағы аты дардай әл- Фараби  атындағы Қазақ ұлттық университеті «оқиға сыртта болған» деп жауапкершіліктен сытылып кетіпті. Әкімдіктегілер де өсіп тұрған талдан айнып, ақыры қыздың өзін кінәлап тынған.   

Мөлдір Ержанова:

-Мүмкін «наушникпен» кетіп бара жатқан шығар деп келеке етіп отыр. Сол қарайтын аймақтың басшысы жазалануы керек! Болашақта ешкімнің басына ағаш құламас үшін. Ол жерде қаншама жастар жүреді, студенттер жүретін жер. 

Десе де, шенеуніктер ағаштан зардап шеккен студенттің қолына еміне деп 150 мың теңге ұстатып кетіпті. Сөйтіп, ертеңіне айналадағы емендер мен қайыңдарды отап, жылан жалағандай еткен.       

Жадыра Құрманғалиева:

- Коммуналдық шаруашылық қызметкерлері шіріген ағаштарды кесіп, сенбілік жүргізіп жатыр деп хабарлады. Бізге ол жердің иесі жоқ деген жауап келді. Ешкім жауапкершілікті мойнына  алғысы келмейді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!