Павлодарда немересін жетектеген қарияның опырылған жер астына түсіп кетуінің себебі айтылды
Павлодарда немересін жетектеген қария жер астына түсіп кетті. Қаланың қақ ортасындағы жаяу жүргіншілер жолағынан өте бергенде асфальт аяқасты опырылып түскен. 5 метр шұңқырдың ішіне омақаса құлаған зейнеткер мен 4 жасар бала қазір ауруханада жатыр. Ал тас жолдың ойылуына жер астындағы ескі кәріз құбырынан кеткен су себеп болыпты.
Автор: Әйгерім Шакаманова
03.10.2016
Тапа-тал түсте пайда болған шұңқырға түсіп кеткендердің хәлін айтпағанда, маңына жақындау қорқынышты. Жаяу жүргіншілер жолағымен өтіп бара жатқан зейнеткер мен оның 4 жасар немересінің құлап кеткенін көргендер мұнда бірден жедел жәрдем шақырған екен.
Людмила Алькова, оқиға куәгері:
– Жолды кесіп өтпек болған әйел мен бала бірнеше секунд ішінде төменге түсіп кетті. Дәріханаға жүгіріп кіріп, ондағы телефонмен құтқарушылар мен полицияға хабарластық. Олар жеткенше осы жерден табылған әскери адам көлігіндегі арқанмен әйел мен оның немересін шұңқырдан алып шықты.
Жерге басымен құлаған 4 жасар бүлдіршіннің миы шайқалғпн. Ал 58 жастағы әжесі шошынып қалғаны болмаса дін аман. Кішкентай қыз енді бір аптадай дәрігерлердің бақылауында болмақ. Аяқасты адамдарды мертіктіре жаздаған жайтқа кімдердің жауап беретіні әзірге белгісіз. Құлағандарға көмектің болар-болмасын да әкімдік қарастырып жатыр.
Асфальт опырылып, бүгін екі адам шұңқырға түсіп кеткен бұл жерде бірнеше жыл бұрын осыған ұқсас оқиға болған. Ол кезде кәріз құбырын жөндеген жұмысшылардың үшеуі жарақат алса, бір адам топырақ астында қалып көз жұмған. Ал бүгін тағы қайталанған жағдайға сол құбырлардың бірінен кеткен су себеп болған деген болжам бар. Әзірге апат орны қоршалып, жолдың бір жағындағы қозғалысқа шектеу қойылған.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
