Тіпті жедел жәрдем мен өрт сөндіретін көліктердің дабыл белгісі түске дейін қала бойынша тынышталған жоқ. Бетперде киген сарбаздар «Нұр Отан» партиясы мен мұғалімдердің біліктілігін арттыру иститутының ғимараттарына келгендерді әй-шәйға қаратпай қуып шыққан. Артынша иісшіл иттермен кинологтар да жетті. Сол маңдағы Абай атындағы гүлзар жанындағы жолдар жабылып, көлік қозғалысы тоқтатылды. Сөйтсе, бұл күш құрылымдарының жаттығуы екен. Мұны өздері тек түске таман хабарлады. Аймақтағы күш құрылымдарының әзірлігін Астанадан келген антитеррорлық штаб өкілдері сынамақ болыпты. Сондықтан алдын ала ешкімді ескертпеген. Ал жаздағы содырлардың сойқанынан жүрегі шайлығып қалған тұрғындар апта сайын өткізілетін мұндай жаттығудан зәрезап болған.