Есілдің сол жағалауындағы мына қалашық «Қазақстан темір жолы» ұлттық компаниясының қызметкерлеріне арнайы салынған. Тұрғындар баспанамызда жылу жоқ деп  шулап жүр. Өйткені, пәтер қожайындарының жартысының кооперативке миллиондаған теңге қарызы бар.

Жанар Таласбаеваның өткен жылғы жылу маусымынан қалған 100 мың теңге қарызы бар екен. Ол пәтер иелері кооперативі белгілеген тарифпен келіспей, бір тиын да төлемей қойған. Тарифті де, жылуға кеткен шығынды да қайта есептеуді талап етіп отыр. Жылу берілмеген үйлерде қара суық. Қанша қалың киінгенімен  кішкентай балалар қайта-қайта ауырып қалады. Үлкендер де оранып жүреді.

Ырысқал Омарова, Астана қаласының тұрғыны:

- Мынаның ішінде неше дамбал. Міне, бәрін көрсетейін. Қабат-қабат не масқара бұл?

Жалпы, бұл үйдегі тұрғындардың 40 пайызының былтырдан қалған берешегі бар. Онысы 86 миллион теңгеге жуықтады дейді кооператив өкілі.

Асқар Смағұлов, пәтер иелері кооперативінің өкілі:

-Біз дизель отынын сатып ала алмай отырмыз. Соған қарамастан үйлерге кезең-кезеңімен жылу беріп жатырмыз. Бір-екі күнде жанармай келеді. Соны  күтіп отырмыз.

Осылайша, бұл үйдегі пәтерлерге 15-ші қазанда жаппай жылу берілетін болды. Естеріңізге салсақ, Астанада жылу маусымы қазанның 1-і басталған болатын. Қазір елордалықтар ғана емес, еліміздің солтүстік аймақтарындағы бірнеше қалада тұрғындар әлі суық пәтерлерінде бүрсеңдеуге мәжбүр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!