«Тараз» фильмі мол пайдаға кенеліп жатыр
«Тараз» криминалдық драмасы көрерменнің ыстық ықыласына бөленіп жатыр. Фильмге қызығушылардың көптігі сонша, санаулы күнде түсірілімге кеткен шығынның жартысынан астамын қайтарып алған. Туындының 4 күндік табысы 85 миллион теңге. Тіпті, жұрттың «Таразды» бір емес, бірнеше мәрте тамашалап жатқанына қарағанда, ол өз-өзін ақтап қана қоймай, мол пайдаға кенелетін сыңайлы.
Автор: Нұргүл Нұрланқызы
19.10.2016
Шынайы өмірден алынған сценарий, сәтті іріктелген актерлер мен оператордың жоғары деңгейдегі шығармашылық жұмысы. Осының бәрі үйлесім тапқан «Тараз» драмасын көрермендер бірінші күннен-ақ жоғары бағалады. Қазір осы туынды көрсетіліп жатқан залдардан ине шаншар орын жоқ. Фильм прокатқа шыққалы көрермен саны бойынша кинотеатрларда көштің басында тұр.
-Біздің күтетініміз - ең бастысы жақсы қорытынды. Және ойымызда жақсы көңіл-күй қалдыру.
Негізі, режиссер Нұртас Адамбай бұл туындыны түсіруге 400 мың доллар жұмсаған. Ал, фильмнің 4 күндік табысының өзі 250 мың доллардан асып отыр. Сондықтан, көрермен көзайымына айналып үлгерген криминалдық драманың өз-өзін емін-еркін ақтары сөзсіз.
Дмитрий Кириенко, кинотеатрлар желісінің коммерциялық директоры:
- Бұл ойдан шығарылған оқиға емес. Фильмде тек шынайы өмірде болатын жағдайлар көрініс тапты. Ол сонысымен де қызық. Ешқандай артық кеткен тұсы жоқ. Кем түскен жерін де байқамадым.
Комедиялық туындыларымен танылған режиссердің жаңа фильмі әлеуметтік желілерде де қызу талқылануда. Көрген киносынан мін таппай қоймайтын сыншылардың өзі «Таразды» мойындады.
Ерден Телемісов, актер, каскадер:
- Соңғы рет осындай жоғары сапалы туындыны қашан көргенім есімде жоқ. Бұл фильм - біздің елдегі кино саласының дамуына жаңа жол ашты. Қазақ кинематографиясына осындай сапалы туындылар қажет!
Жұрт мақтаған «Тараз» Лос-Анджелесте өткен кинофестивальде төл туындымыз қос бірдей марапат алған. Ал елімізде 13 қазаннан бастап прокатқа шыққан болатын.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
