Екі комиссариат қызметкері мен полицейлер әскерден қашып жүрген жігіттердің үйін аралап жүр. Өйткені, барлығы бірнеше рет шақырту қағазын алса да, қорғаныс істер басқармасына мүлдем келмеген.

-Мұқарбек қайда?

-Үйде жоқ, жұмыстарымен шығып кетті.

Комиссариат қызметкерлері мен полиция болашақ сарбаздарды  осылай үйінен ұстай алмағасын базар маңын торуылдады. Бірақ саудагерлерді қууға емес, қару ұстағысы келмейтіндерді аңду үшін.

-Құжаттарыңыз бар ма?

-Студент билеті бар.

-Қазір өзімде жоқ. 

-Онда сізге әскерге шақырту қағазын жазып береді. Шақырту қағазымен ертең келесіз.

Сөйтіп, бірнеше бозбалаға тура автобустың ішінде шақырту билетін жазып беріп, қолдарын қойғызып алды. Енді заң бойынша олар әскери басқармаға келуге міндетті. Әйтпесе, айыппұл арқалайды.

-9-ға қарай келіп  анализ тапсырасың.

-Жақсы ма? Комиссиядан өтесіңдер....

12 ай қару ұстап казармаға түнегісі келмейтін жігіттердің өтірігі көп. Бірі мекен-жайын жиі өзгертсе, екіншілері жүз ауруын санап беруге даяр. Майтабан, омыртқасының қисық бітуі, салмақ жетіспеушілік бұл сылтау ретінде жиі айтылатын диагноздар. Әскери комиссариат енді осындай тың әдістен  кейін бозбалалардың санасының өзгеретініне сенімді. Ал, биыл елімізде күзгі науқан бойынша қарулы күштер сапына 15 мың жауынгер алынуы тиіс. Бірақ жыл сайын армиядан жалтаратындардың көптігінен бұл меже орындалмай қалуы әбден мүмкін.

Ғани Артықов, Астана қалалық Қорғаныс істері департаменті бастығының орынбасары:

-Уақытылы келмеген азаматтар   қылмыстық кодекс  болмаса әкімшілік шара қолданылатынынан бейхабар. Кейбіреуі қолым тимей жатыр деп салғырт қарайды.

Ал отан алдындағы борышын өтеуден бас тартқандар бір жылға түрмеге қамалуы мүмкін. Немесе бір миллион теңге айыппұл төлейді. Денсаулығы жараған жігіттерге шығынданбаудың жалғыз жолы –казармадан қашпау.Оның үстіне әскери билеті барларға кейін  жұмысқа орналасу  да оңайырақ болмақ.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!