1987 жыл. Шалғайдағы ауылдан Алматыға қоныс аударған жасөспірім жігіт... Дәл осы тұста фильмдегі басты кейіпкер Арсеннің өмірі мүлдем басқа арнаға бұрылады. Себебі, қалалық жігіттердің бұлжымас өз заңы бар.

- Пацаны, старшаки! Общий салам!

Драмада өзге ортаға тап болған бозбаланың қиын тағдырымен қоса, қала тұрғындарының өмірі көрініс тапқан. Туынды көрерменді 80-жылдардың соңына еріксіз алып барады. Себебі, ондағы оқиғалар шынайы жеткізілген. Ол үшін режиссер Ақан Сатаев арнайы мамандардың көмегіне жүгініпті.

Ақан Сатаев, режиссер:

- Кеңесшілер түсірілімде бастан-аяқ жүрді. Себебі, қазіргі жастар мен 87-інші жылдағы жастар жер мен көктей. Бір-біріне мүлдем ұқсамайды. Мамандар бізге сол кездегі жасөспірімдердің  іс-қимылын, киім киісін айтып отырды. Олар болмаса фильм мұнша сәтті шықпас еді.

Туындының тақырыбы да, актерлік құрамы да ұзақ таңдалған. Кейіпкерлерді көбіне бұрын-соңды киноға түсіп көрмеген жас актерлер сомдайды. Картинаға Әсел Сағатова, Гүлнар Досматова, Жандос Айбасов сынды бірқатар танымал актерлер де түскен. Сондай-ақ, басты рөлдердің бірі Ақан Сатаевтың қызына бұйырыпты.

Мәриям Сатаева, актриса:

- Мен де өзге актерлер сынды, арнайы кастинг арқылы қабылдандым. Бұл – менің кино әлеміндегі алғашқы қадамым. Фильмнен үйренгенім көп болды. Актерлік шеберлігім де шыңдала түсті.

Фильм алғашқы көрсетілімдерінен-ақ көпшіліктің ықыласына бөленуде. Ол кешеден бастап еліміздегі барлық кинотеатрлардан көрсетіліп жатыр. Ал алдағы уақытта туындыны КТК телеарнасынан да тамашалайтын боласыздар.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!