«Алматы Тауэрс» директорының қамауға алынуы адвокатының түсінбестігін туғызды
6 жұмысшысы өртеніп кеткен Алматыдағы батут орталығының директорын тергеу қамау – сауатсыз судьяның ісі. Қазір қамауда жатқан Дәурен Тұяқовтың адвокаты сот шешімін осылай бағалады.
Автор: Ербол Тұрымбет
18.11.2016
«Алматы Тауэрстегі» алапат өртке қатысты күн өткен сайын жаңа деректер шығып жатыр. Адвокаттың айтуынша, апатты жағдайдағы шығар есікті батут орталығының басшылығы емес, бірер апта бұрын жалпы бизнес орталығының әкімшілігі жауып тастаған. Ал ғимаратты от шарпыған кезде «Алматы Тауэрстің» өртке қарсы жүйесі істемей қалған. Ірі бизнес орталығының бір бөлігі 6-шы қараша күні отқа оранып, салдарынан 6 адам қаза тапқан еді. Оның бесеуі студент болып шықты. Осыған байланысты от тұтанған батут орталығының директоры Бостандық аудандық сотының шешімімен тергеу қапасына қамалған болатын. Алайда Әкімшілік кодекс бойынша, әдейі жасалмаған қылмыс аса қауіпті деп саналмайды екен. Сондықтан Дәурен Тұяқовтың адвокаты судья заңды белшеден басып отыр дейді.
Жохар Өтебеков, Д. Тұяқовтың адвокаты:
-Судьяның мұндай қарапайым нәрсені білмеуі ұят. Өрескел қателік жіберіп отыр. Заң факультетінің екінші курсының әңгімесі. Біз енді бұлтартпау шарасын жеңілдету жөнінде сотқа шағым түсіріп отырмыз.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
