Алматы тұрғыны жалғыз баласын қағып өлтірген жүргізушіні жауапқа тартқыза алмай жүр
Алматы тұрғыны жалғыз баласын қағып өлтірген көлік жүргізушісін жарты жылдан бері жауапқа тартқыза алмай жүр. Жеңіл машина бірінші сынып оқушысын аулада ойнап жүрген жерінен оңдырмай қаққан екен. Салдарынан 8 жасар Бористің жүрегі жарылып, өкпесі аузынан бір-ақ шыққан. Жеткіншек сол арада тіл тартпай кетіпті. Ал оны қаққан келіншекті полицейлер сол күні-ақ қолхатпен жібере салған.
Автор: Аруна Ортай
21.11.2016
Васильченколардың жалғыз ұлын жеңіл көлік дәл есігінің алдында қаққан. 8 жасар Борис аулада басқа жеткіншектермен ойнап жүріпті. Бір топ балаға тап берген жүргізуші оны тіпті ит екен деп ойлап қалдым деген.
Анатолий Васильченко, баланың әкесі:
-Ол балаңызды көрмедім, мысық немесе ит екен деп қалдым деп отыр. Сонда қалай 8 жасар баланы итпен қалай шатастырып алуға болады?
Қатты соққыдан бала басқа көліктің астына түскен. Содан жеткіншектің жүрегі жарылып кеткен. Сот сараптамасы қатты шошынғаннан өкпесінің де жыртылғанын айтады. Бала сол арада тіл тартпай кеткен. Ал жүргізуші «жылдамдықты асырмадым» деп, бар кінәні өлген балаға аудара салған.
Анатолий Васильченко, баланың әкесі:
-Ол өзін кінәлімін деп отырған жоқ. Біресе, баланы ит –мысықпен шатастырдым десе, біресе баланың өзі алдымнан жүгіріп шыққан дейді. Тергеу де созылып кетті. Жарты жылдан бері баламды қағып өлтірген жүргізушіні тіпті қамауға да алған жоқ. Тура бір итті қағып кеткендей қолхатпен босатып жібере салды.
Жүргізуші «жүйіткімедім» дегенімен, көрші үйдің камерасына түсіп қалған мына кадрде көліктің асыққаны көрініп-ақ тұр. Алайда мұның өзі іске дәлел бола алмай, полицейлер бала қаққан әйелді сол күні-ақ қолхатпен жібере салыпты. Кейін тіпті айыпты адамды таппадық деген желеумен істі біржолата тоқтатқан. Десе де, тілшілер араласқан соң іс қайта тергеуге жіберіліп, ал ісіне жүрдім-бардым қараған тергеушіні прокурорлар тексеріп жатыр.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
