Данагүл Аманғалиеваның артында қазір жары мен 8 жастағы ұлы қалды. Тума-туыстарының сөзіне сенсек, жүктіліктің 8-ші айында Махамбет аудандық ауруханасына ауыр хәлде түскен келіншекке мұндағы дәрігерлер ескі сараптама қорытындылары бойынша «өкпенің қабынуы» деген диагноз қойып, ем-дом жасаған. Бірақ науқас нашарлаған соң, жақындарына да айтпастан Атырауға жіберіпті.

Арман Төлендиев, марқұмның жолдасы:

-Махамбет аудандық ауруханасының кесірінен келіншегім мен қызымнан айырылып отырмын. Баламыз жетім қалды, өзім де жалғыз қалдым. Дәрігерлер кінәлі екендерін  мойындап тұр. Жазаларын алсын. Олардың жұмыстан шығып, үйінде аяқ көтеріп жатқандары керек емес маған.

Ал аудандық ауруханадағылар бұл жағдайға қатысты қандай да бір түсініктеме бергісі келмеді. Түсіру тобын орынбасарына сілтеген бас дәрігер оқиғадан бейхабармын деп, камерадан ат-тонын ала қашты.

-Мен сөйлеспеймін КТК болса.

-Біз Данагүл Аманғалиеваның өліміне байланысты

-Жоқ, мен сөйлеспеймін. Оны орынбасарыммен сөйлесіңдер.

-Сіз басшы емессіз бе?

-Осы өлімге байланысты не айтасыз? Дәрігерлеріңіз дұрыс қарамапты ғой.

-Қарады бәрін....

Келіншектің өлімінен соң Атырау облысы бойынша медициналық және фармацевтикалық қызметті бақылау департаменті іле-шала тексеріс жүргізіпті. Нәтижесінде келіншектің өліміне дәрігерлер кінәлі деп тауып, олар жіберген қателіктерді бірнеше бетке тізіп көрсеткен. Тіпті, қылмыстық іс қозғалды.

Жасталап Орақов, Махамбет ауданы прокурорының міндетін атқарушы:

-Осы орын алған факт бойынша 20 қазанда аудандық аурухана дәрігерлеріне қатысты қылмыстық Кодекстің 317 бабының 3-ші бөлігімен қылмыстық іс қозғалды. Қазіргі таңда тергеу амалдары жалғасуда.

Құзырлы орган өкілдерінің айтуынша, қылмыстық іс әзірге тек кісі өлімі дерегі бойынша қозғалып отыр. Бірақ алдағы уакытта тағы да қосымша сараптамалар тағайындалып, тексерістер жүргізілмек. Соның нәтижесінде қызметкерлер қылмыстық жауапкершілікке тартылатын болады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!