Назарбаев: Атымды Астанаға беріңдер деп ешкімге айтқан жоқпын
Атымды Астанаға беріңдер деп ешкімге айтқан жоқпын.Нұрсұлтан Назарбаев елде қызу пікірталас тудырған депутаттардың бастамасына бүгін осылай деп жауап берді. Президент «Нұр» сөзін кез-келген жерге қыстырмаса көңілі көншімейтіндерге де өкпесін айтты.
Автор: Ербол Сейілхан
24.11.2016
Нұрсұлтан Назарбаев, Қазақстан Республикасының президенті:
-«Бірдеңе болса, «нұр», «нұрлы» деген сөзді қосады. Соның бәрі менің жеке басыммен байланысты деп ойлайды. Бұл тақырып туралы айтып жүргеніме көп болды. Бүкіл жерге «нұр», «нұрлы» деп жазсын деген тапсырманы мен берді деп ойлайтын шығар. Кеше ғана Парламент тіпті Астанаға менің атымды беру туралы болжам жасапты. Мен ондай болжам жасаған емеспін және ол туралы тіпті айтқан емеспін.
Ақордаға экономикалық мәселелер бойынша Министрлер кабинетін түгел жинаған Елбасы өкпесін солардың көзінше айтты. Назарбаевтың ойынша, биліктің тәуелсіз тармағы ретінде Парламент шешім қабылдауға құқылы. Бірақ, қала мен елді-мекен атауын өзгертуге байыптылықпен қараған жөн деп ескерту жасады. Айта кетсек, Парламенттің біріккен отырысында депутаттар Тәуелсіздіктің 25 жылдығына орай арнайы декларация қабылдап, Астананың атын «Нұрсұлтан» немесе «Назарбаев» деп атауды ұсынған болатын. Бұл бастаманы қолдай қоймаған Елбасы Астананың атынан бұрын, нақты істермен айналысуға кеңес берді.
Нұрсұлтан Назарбаев, Қазақстан Республикасының президенті:
- Парламентке, жалпы барлықтарыңға қабылдаған декларация үшін алғысымды айтамын. Адам ретінде мұның бәрін жақсы қабылдаймын. Бірақ, бұл бір мәселе. Басқа да жұмыстардың шешілуін қарастыру керек.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
