Ақышев келер жылға болжам жасады
Келер жылы да инфляция деңгейі 6-8 пайыздан аспауы тиіс. Бүгін жыл қорытындысын жасаған Ұлттық банк төрағасы 2017 жылға осындай жоспар құрып отырғандарын жеткізді. Ал 2020 жылға дейін бұл көрсеткішті 4 пайызға дейін төмендетеміз дейді Данияр Ақышев.
Автор: Диас Нұрақын
07.12.2016
Бас банкир валюта нарығының да тұрақталғанын тілге тиек етті. Соңғы 11 айда теңге бар болғаны 0,4 пайызға құлдыраған. Сондықтан Ұлттық банк үш айдан бері валюта нарығына ықпал етіп, интервенция жасауды доғарыпты. Нәтижесінде алтын-валюта қорынан көк тиын шашау шыққан жоқ – деп мақтанды Ақышев. Сондай-ақ Ұлттық банк өткен жылғы девальвациядан желінген салымшыларға өтемақы төленіп біткенін хабарлады. Яғни банктегі депозиттеріне бір жыл бойы тиіспеген салымшыларға 53 миллиард теңге үлестіріліпті. Бас банкир соңғы кездері қозғалып жүрген қаржы ұйымдарының қосылатыны туралы әңгімеге қатысты да пікірін айтты. Мұндай жағдай келесі жылы болуы мүмкін. Ал валюта нарығындағы тұрақтылық сақтала береді деп сендірді Данияр Ақышев.
Данияр Ақышев, ҚР Ұлттық банкінің төрағасы:
-2017 жылы валюта бағамы тағы да еркін айналымда болады. Бір жыл бұрын қабылданған бұл шешімнің дұрыс екеніне көз жеткіздік. Яғни теңгенің нығаюы мен әлсіреуін нарық өзі реттеп отыр. Бұл үрдіске еліміздегі қаржы ұйымдары мен өзге де ірі компаниялар бой үйретіп қалды. Сондықтан бұдан кейін де қаржы нарығы тұрақты болады деп сенеміз.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!