Ол аймақтағы қара алтын айналасындағы қарақшыларды жақсы білген. Айыптау қорытындысына қарағанда, қорғауға алғаны үшін «Ағайынды төртеудің» серкесі Еркін Ізбасардың сыбайластарынан ақша алып отырыпты. Рахат Аханов өзінен тергеушілер сезіктеніп жатқанын министрліктегі әріптестерінен біліп қойған екен. Сондықтан істің мән-жайын білмекке Ақтөбеге келуді жоспарлағанын сотқа жеткізді. Ол осы өңірдегі ішкі істер департаменті бастығының орынбасары болып бес жыл қызмет атқарғанын да айта кетейік. Жаздағы лаңкестік оқиғадан соң жұмысынан кетіп, кейін Астанаға жұмысқа щақырылған болатын. Күдікті сотта өзінің қан қысымы көтеріліп, денсаулығының сыр беріп жүргенін айтты. Дегенмен, мемлекетті айыптаушылар тергеуге кедергі келтірмеу үшін оның қамауда болғаны дұрыс деп отыр. 

Айбек Шоқпаров, мемлекеттік айыптаушы:

-Аханов 2014-2016 жылдар аралығында Ақтөбе облыстық ішкі істер департаменті бастығының орынбасары болып тұрғанда бас пайдасын ойлап, қылмыстық топпен байланыста болған. Мұнай ұрлығына көз жұма қарап, ол үшін ақша алған. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!