-Жаңа жылдан бері еліміздің әр аймағында жанармай бағасы біртіндеп көтеріліп келеді. Әсіресе ең көп сұранысқа ие АИ-92 маркалы сұйық өтын соңғы уақытта тіпті қымбаттай бастаған. Мәселен жыл басында 135 теңге болған сұйық отын қазір 137-139 теңге көлемінде сатылып жатыр.

Ал алдағы уақытта бұл баға тағы 6 теңгеге дейін өсуі мүмкін. Өйткені еліміздегі ең ірі жанармай сатушы «ҚазМұнайГаз Өнімдері» компаниясы АИ-92 жанармайын 145 теңгеге дейін қымбаттатуды ұсынды.

«ҚазМұнайГаз Өнімдері» компаниясы бөлшек бағалар трендін бір литрге 140-145 теңге деңгейіне дейін бағыттайды. Бұл ағымдағы кезеңде теңгеруші баға. Бағаларды ретке келтіру мұнай өнімдерін кедергісіз импорттауға мүмкіндік береді. Яғни отын тапшылығының алдын алуға болады.

Компанияның мәліметінше, бағаны қымбаттатса ішкі нарықтағы жанармай тапшылығы жойылады екен. Өйткені біз тұтынатын бензиннің 35 пайызы Ресейден тасымалданады. Ал көрші елде жанармайдың бұл түрі едәуір қымбат. Соңғы уақытта Қазақстандық арзан жанармайды керісінше теріскейге тасу белең алған. Сондықтан бұл тығырықтан шығу үшін бағаны қымбаттауға тура келеді дейді мамандар. Тек бұл ұсыныс жүргізушілердің көңілін күпті етіп отыр.

Бейсебек Жарқынбаев, Алматы қаласының тұрғыны:

-Енді өзіміз бензин шығарамыз, ұят.Адамның айлығына қарау керек қой. Орташа 50 мың теңге аламыз. Ауылдағылар 30 мың алады. Бензинді көтеретін болса салықты  алып тастау керек.

Жанармай қымбаттайды деп айтып ауыз жимастан еліміздің солтүстік өңірлерінде баға шарықтап шыға келді. Мәселен Павлодар қаласындағы кейбір бекеттерде АИ-92 маркалы бензин қазірдің өзінде 145 теңгеден сатылып жатыр. 

Николой Козловский, Павлодар қаласының тұрғыны:

-Бензин бағасы күн сайын қымбаттап барады. Қазір көлікке толтырып жанармай құю үшін қалтаңда кемінде он мың теңге болуы тиіс. Меніңше мемлекет жанармай бағасын реттеп отыруы тиіс.

Ал қымбат бензин қызылжарлықтар үшін тіпті таңсық емес. Ресеймен шекаралас аймақта жанармай бекеттері баға жазылған тақтайшаны бір ай бұрын -ақ өзгертіп қойған. Яғни мұнда АИ 92 маркалы бензин былтырдан бері 141-143  теңгеден сатыла бастады. Өйткені өңірге қажетті отынның 40 пайызы көрші елден жеткізіледі екен.

Мұрат Нұрқанов,СҚО кәсіпкерлікті дамыту басқармасының бөлім басшысы:

- Ресейде жанармайдың көтерме бағасы қымбаттады. Ал біз  жетпеген бензин қорын көрші елдікімен толықтыруға мәжбүрміз. Қазір АИ -92 маркалы бензин бағасы 145 теңгеге жетті.

Ал оңтүстік өңірлерде қымбатшылық қолдан жасалуы мүмкін деген қауіп бар. Өйткені Оңтүстік Қазақстан облысында қазірден бастап жанармай тапшылығы сезілуде. Мәселен бұл аймақ бір айда 25 мың тонна АИ-92 жанармайын тұтынады екен. Алайда қаңтар айында сол көлемнің тек жартысы ғана жанармай бекеттеріне түскен. Алыстағы ауыл-аймақтарға берілген бензин көлемі тіпті мардымсыз. Өйткені облысқа бөлінген сұйық отынның басым бөлігін ірі жанармай бекеттерін алып қойған екен.

Енді сондай алпауыттардың бірі бағаны көтеруге құлшынып отыр. Егер бұл ұсынысты басқалары да қолдаса қымбатшылықтан қашып құтыла алмайтынымыз айдан анық. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!