Атырауда Қашағанның мұнайымен жағылған универсиада алауы өшіп қалды
Универсиада алауы еліміздің батыс өңірлерінде жағылды. Бұл аймақтарда жұрт шырақ алып өтетін спортшыларды көру үшін таң атысымен көше бойына жиналған. Атырауда эстафета кезінде алау өшіп қалып, ұйымдастырушылар әбігерге түссе, Ақтөбеде оны ұстайтындардың тізімі сан қайтара өзгерумен болды.
Автор: Жаңалық Ахаш
27.01.2017
Қара алтынның астанасы саналатын Атырауда алауды тұтату үшін мұнайды пайдаланған. Оны Каспийдің солтүстігіндегі Қашаған кен орнынан жеткізіпті. Осыншама тер төгіп әкелінген шырақты спортшылар эстафета кезінде өшіріп алды. Амалы таусылған ұйымдастырушылар оны басқа құтымен ауыстырып әлекке түсті.
-Ал Ақтөбеде ұйымдастырушылар эстафетаға қатысушылардың тізімін бірнеше қайтара түзетумен болды. Өйткені бұған дейін волейболшы Сабина Алтынбекова алау ұстаудан бас тартса, Қытайда көрермендерін тәнтті еткен әнші Димаш Құдайберген өзінің қатыса алмайтынын айтыпты.
Бейжіңде танымал тележобаға қатысып жатқан Димаш ертең байқаудың екінші кезеңінде бақ сынайды. Сондықтан Ақтөбеге жетіп үлгермейді екен. Бірақ ол жексенбі күні Алматыда Универсиаданың ашылу салтанатында ән шырқамақ. Ұйымдастырушылар ол үшін арнайы музыка жаздырған.
Маңғыстаулықтар эстафета кезінде ұлттық құндылықтарды дәріптеуді жөн деп тапқан. Мұнда батырлар жол бастап, бағзы замандағы бабалардың отқа табынғанын театрландырылған көрініспен жеткізді. Алауды аймақ басшысы Алик Айдарбаев тұтатып, оны Алматыға жеткізуді олимпиададан екі мәрте олжалы қайтқан боксшы Әділбек Ниязымбетовке тапсырған.
Әділбек Ниязымбетов, бокстан Қазақстан құрамасының капитаны, Олимпиаданың екі дүркін күміс жүлдегері:
-Өзім қуаныштымын әрине. Бүкіл Маңғыстау қуанышты деп ойлаймын. Енді Құдай қаласа, ертең Алматыда жалғасы өтеді. Осылай Қазақстанымыз өркендей берсін. Өрлей берсін!
Оралдықтар да көршілерінен қалыспады. Бұл өңірде спортшыларды көше бойымен құр жүгіртіп қана қоймай, жігіттерді жинап флеш-моб ұйымдастырған. Универсиада алауы әр өңірден Алматыға арғы күні жеткізіледі. Одан соң әлемнің алпыс елінен жиналған екі мыңдай спортшы бір апта бойы қысқы спорт түрлерінен бақтарын сынайды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
