Универсиаданың алғашқы күні Қазақстан қоржынына бірнеше медаль түсті
Алғашқы медальдарды арулар алды! Универсиаданың бірінші күні Қазақстан қоржынына қос қола мен күміс түсті. Анна Шевченко 5 шақырымға шаңғымен жүгіруден үшінші орын алса, тағы бір қола мен күміс фристайлшы қыздар Жібек Арапбаева мен Жанбота Алдабергенованың еншісінде. Әзірге ұлттық құрама осы үш медальмен 5-ші орында тұр.
Автор: Ербол Тұрымбет
30.01.2017
Шаңғымен биіктіктен секіруден өкінішке орай ұлдарымыздың жолы болмады. 11-ші нөмірмен шыққан Дархан Мұхамеджанов таудан түсем деп оңбай құлады. Бағлан Іңкәрбек те сайысты құлай жаздап аяқтады. Салдарынан, үш жүлде де қытайлықтар мен ресейліктерге бұйырды. Есесіне, қыздарымыз жарап тұр. Акробаттарша екі айнала таудан секіріп түскенде шулаған барша жанкүйер демін ішіне тартты.
Жанбота Алдабергенова, қола медаль иегері:
-Бәрі жақсы, қолдау күшті болды. Енді сенімді ақтауға тырысып жатырмыз. Қолда тұрған ұтысты жіберіп алмау керек!
Қытай, Ресей, Белорусь секілді мықты қарсыластарымен теңдей теріскен үш спортшымыз да намысты бермеуге тырысты. Десе де, әр кезеңге өткен сайын ойын ережесі де күрделене түсіп, қауіпті сәттер көбейе түсті. Таудан құласа да, қыздарымыз тұғырдан құламады. Фристайлдан финалға шыққан қос спортшы да соңғы күшін жарысқа жұмсап, Жібек Арапбаева – күміс, ал Жанбота Алдабергенова қола жүлде ұтып алды.
Қалипа Арапбаева, Жібек Арапбаеваның анасы:
-Жанботам құлаған кезде жылап қалдым. Ойлаған едім, алтын да, күміс те өзімізде қалады деп. Кім біледі біз түсінбейміз ғой, сәл кемшілік болды ма, мейлі бұған да құдайға шүкір!
Ал керлингтен сынға түскен қыздарымыздың өкінішке орай жолы болмай, Германияға есе жіберді.
Бүгінгі жарыста универсиаданың алғашқы үш медалін де осылайша арулар салды. Универсиаданың ертеңгі күні де осындай тартыстарға торлы болмақ. Қазақстан хоккейден әйгілі Швеция ерлер құрамасымен кім мықтыны анықтайды. Шаңғыдан да тағы қыз-жігіттерден медаль күтетін боламыз. Әзірге, менде бар ақпарат осы.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
