Батыс Қазақстанда тағы бір шенеуніктің былығы ашылды

Бұл жолы облыстық ауыл шаруашылығы басқармасының экс-басшысы Марат Оңғарбеков ұсталып отыр. Ол жергілікті кәсіпкерлер мен қоластындағы қызметкерлерден тұрақты түрде пара алған. Экс-шенеунік басқармаға 3 жылдай жетекшілік етті. 58 жастағы Оңғарбеков тықырдың таянғанын білсе керек, ұсталардан небәрі екі күн бұрын ғана өз еркімен қызметінен кетіпті. Бірақ жазадан оңай құтылмасы анық. Жемқорлыққа қарсы күрес ұлттық бюросының өкілдері оның кәсіпкерлер мен қарамағындағы қызметкерлерден қолдау көрсеткені үшін жүйелі түрде ауызбастырық алып отырғанын әшкерелеген.