Жасы 70-ке таяған Үміт Ниязова 1995 жылы қоныстанған мына екі бөлмеде баласы мен немерелері бар, барлығы 8 адам сығылысып отыр. Өзі бір септігі тиер деп зейнетке шыққанша осы үйдің есік алдын сыпырып, күл қоқысын тазалаған. Әкімдіктің табалдырығын сан тоздырғанда, ондағылар құжаттарды рәсімдеп бермесе де, баспана өзіңізде қалады деп айтқан екен.

Үміт Ниязова, Қарағанды қаласының тұрғыны:

-Дәл осы сасық бөлмесін беріп кетер едім.  Бірақ баратын жер жоқ. Мынау жетім бала бейшара. Бір апам бар еді ол да өлді.

Соттан шақыру алған Жанна Хандоганың мына бөлмеде тұрғанына он жыл болыпты. 4 баласы мен күйеуі бар, құрқылтайдың ұясындай 12 шаршы метрде еріккенімізден отырған жоқпыз дейді ашынған тұрғын.   Жанна сынды 15-ке тарта отбасыдан соңғы күндері күндіз күлкі, түнде ұйқы қашқан.

-Мына жатақханадағы қуықтай бөлмедерде бала-шағаларымен тығылып отырған тұрғындар енді соттың табалдырығын тоздыратын болады. Онсыз да қалт-құлт еткен жұрттың бұл тіпті мазасын қашырды. Ал шенеуніктер тұрғындар баспаналарының өздеріне тиесілі екенін дәлелдей алмаса, оларды ойланбастас далаға қуып шығамыз дейді.

Сәлжан Балаубаев, Қарағанды қалалық тұрғынүй қатынастары бөлімі басшысының орынбасары:

-Бұл тұрғындар баспаналарға өз еріктерімен қоныстанып алған деген күдік бар. Құжаттары дұрыстары баспаналарын жекешелендіріп алды ғой. Егер оларға бөлмелер қандай да бір ұйымның атынан берілген болса, сотта дәлелдесін. Ал 10-15 жыл тұрдым деуі, баспана солардыкі деуге негіз емес.

Шенеуніктер қаланың жатақханаларындағы құжатсыз баспаналардың бәрі осы жолмен мемлекет меншігіне өтеді деп отыр. Босаған бөлмелер ең алдымен кезекте тұрған жетімдерге беріледі екен. Заңның реті сол. Осыған қарағанда, қыстың көзі қырауда далада қалатындар саны әлі көбейетін түрі бар.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!