Петропавлдағы мына көпқабатты үйдің жертөлесіндегі құбыр  жарылып, тұрғындар аязды күні жылусыз отырды. Бір тәулік бойы тыным таппаған мамандар апат зардабын әзер жойған. Артынша оның себебін анықтаған арнайы комиссия да бар кінәрат пластик құбырдан деп тоқтам жасаған.

Әсел Қалиева, Петропавл қаласының тұрғыны:

-5 жыл бұрын пластикке ауыстырсын деген еді. Ауыстырдық. Енді қайтадан темірге ауыстырсын дейді. Оның бәрі шығын ғой. 

Тұрғындардың айтуынша, кезінде тозығы жеткен темір құбырларды пластикке ауыстыру туралы ұсынысты пәтер иелері кооперативінің төрағалары жасаған екен. Ал олар бұл материалдың жарнамасына сеніп қалдық деп отыр. Уақыт өте келе оның жылу жүйесіндегі 70 градус ыстыққа төзбейтіні белгілі болды.

Максим Ананьев, пәтер иелері кооперативінің төрағасы:

-Пластик құбырлар арзан. Оны дәнекерлеу де оңай. Түрі де әдемі. Біз соған қызықтық. Әрі 50 жыл кепілдік береміз деген жарнамаға сендік.

Қазір Петропавлдағы көпқабатты үйлердің 60 пайызында пластик құбырлар тұр. Ал жылыту маусымы басталғалы 3 үйде апат болған. Былтыр жазда құбырды жуып шаю кезінде де төрт үйдегі осы материалы қысымға шыдас бермей жарылыпты.

Александр Захарьян, «Петропавл жылу желілері » ЖШС бас инженері:

-Пластик құбырдың  ішкі диаметрі  теміріне қарағанда 2 мм кем. Сондықтан олардың түйіскен жеріне қысым түседі де, құбыр жарылады. Біздегі пластик құбыр 4-5 жылға ғана жарайды. Әйтеуір, жыл сайын апаттан көз ашпайтын болдық.  

Энергетиктер қалада жаңадан салынып жатқан үйлерде ғана пластик құбыр тартуға рұқсат беріпті. Өйткені құрылысшылар жаңа ғимаратқа автоматты қысым реттегіш құрылғыны қоса орнатады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!