Бұл ауқатты отбасылар тұратын сәулеті ерекше үйдің сыртына қарасаң ешқандай түйткілі жоқ сияқты. Бірақ жарықтың жоқтығынан іші қара түнек. Себебі ұрылар айналадағы қаптаған бейнекамераға қарамастан 2 шақырым электр сымын топырақтан аршып алып кеткен. Сөйтіп, мысты 50 мың теңгеге сатып жіберіпті. Енді энергетиктер оны қалпына келтіре алмай әлек. 

Дархан Ибраев, «Астана-РЭК» қызметкері:

- «Астана гранд» жәнеде мына үш квартал: «Ағылшын», «Француз» «Италья»,  «Городской романс»та электр қуаты    өшті. Кабельді  кеше 5 рет қосып едік, 5 рет өшті. Кабель жарамсыз боп қалған.

Ұрыларды кернеуі жоғары тоқ та үркіте алмаған. Ал желіні қайтадан жерасты арқылы тартып шығу үшін әлі екі апта уақыт және миллиондаған қаржы керек екен. Қазір жұрт түнде майшам жағып амалдаса,  ет, сүт сынды тез бұзылатын тағамдарын балконға шығарып амалдауда.  

Гүлжазира Ысқақова, Астана қаласының тұрғыны:

-Егер Астананың қақ ортасында элиталық үйде тұрып осындай күн кешсек, қаланың шет жағында не болып жатқанын кім білсін. Екі күннен бері тамақ-шәй іше алмай отырмыз.

Жарықтың әзір болмайтынын естіген тұрғындар дүкендегі майшамды да талап әкетіпті. 

Эльвина Ұзақбаева, дүкен сатушысы:

-Төрт қорабы болған.  Соның бәрі өтіп кетті.

Әкімдіктегілер жүздеген отбасы тұратын ірі 5 кешеннің біреуін ғана қуат көзіне қосқан. Қараңғы құшағында қалған басқа үйлердің жарыққа қашан қосылатыны белгісіз. 

Өйткені бірнеше шақырымға созылатын тоқ сымының кесілген тұсын тауып оны жалғау оңай шаруа емес. Сондықтан апатты қалпына келтіру ұзаққа созылуда. Ал танымал элиталық үйді жарықсыз қалдырған ұрыларды қазір полицейлер іздеп жатыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!