Күнде ертең деген ертегіге сеніп бірнеше айдан бері жалақы көрмегендер бүгін осылайша кәсіпорын алдына жиналуға мәжбүр. Айлықтарын беруді талап еткен 30-ға жуық адам жұмысқа шығудан бас тартып, басшыларын бетпе-бет сөйлесуге шақырып еді. Алайда көптің онысынан түк шықпады. Күзетшілер жиналғандарды табалдырықтан аттатқан жоқ.   

Нұржас Орманов, бұрғылаушы:

- Менің алты балам бар. Бәрі мектепте. Пәтерде тұрам.

Наразылыққа шыққандар «Жамбылгипс» кәсіпорынының таудағы бұрғылау цехында еңбек етеді. Айтуларынша, жалақылары да мардымсыз. Олар бұған дейін де бірнеше мәрте айлықтарын даулаған екен. Бірақ нәтиже болмаған. 

Болатбек Айтбаев, дәнекерлеуші:

-Арты 15, алды 35 мың-ақ болып қалды. Әйтпесе 60 мың еді алатын айлығымыз. Сол 15 мыңымызды ала алмай отырмыз. Не үшін? Жоқ ақшалары. Күтіңдер дейді.

Ал, өндіріс орнының басшысы жұмысшылардың айтқандарын жоққа шығарып, қайта өздерін кінәләды. Айтуынша, тек бір айдың жалақысы берілмеген. Өйткені өздері айлықты көтеруін талап етіп, жұмысқа шықпай қойыпты. Екі жақты келіспеушіліктен осындай дау туындаған.   

Болат Таласбаев, «Жамбылгипс» АҚ вице-президенті:

-Бұл маусымдық жұмыс. Жазда олардың жалақылары 200 мыңға дейін барады. Қазір айлықты көтере алмаймыз. Олар оны түсінбейді. Өздері жұмыс істегісі келмейді де,тіпті келмей де қояды. Енді келіп көп қаражат алғысы келеді.Бұл дұрыс емес қой..

Қазір «Жамбылгипстің» жұмысшыларға нақты қанша берешек екені белгісіз. Оны енді құзырлы орындар анықтамақ. Өйткені қызметкерлері еңбек инспекциясы мен прокуратураға арыз түсірді. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!