4 жасар Әсияға қарап қауіпті дертке шалдыққан деуге аузың бармайды. Алайда былтыр одан глютенді ауру анықталыпты. Яғни, кішкентай қыздың ағзасы дәнді дақылдардың құрамында болатын ақуызды сіңіре алмайды.

Динара Бисембекова:

- Бастапқыда қызымда әлсіздік пайда болды. Мазасызданып, ұйықтай алмайтын. Іші ауырып, өз-өзінен ісініп кететінді де шығарды. Уақыт өте келе тіпті, жүруден қалды.

Енді Әсия өмір бойына арнайы диетаны ұстануы тиіс. Өйткені ағзасына түйірдей глютен барса, қатты ауырып қалады. Ал, бұл ақуыз біз күнделікті қолданатын азық-түліктің көбінде бар. Нан мен өзге де ұн өнімдерінен бастап, кәмпит пен жармалардың құрамында кездеседі. Ал глютенсіз тағамның тым қымбаттығы өз алдына, оны кез-келген жерден сатып алу да мүмкін емес.

Динара Бисембекова:

-Глютенсіз мына ұнның 1 келісі 2400 теңге тұрады. Осыдан қызыма нан пісіріп беремін. Ал, 400 грамм макаронның өзін 890 теңгеге сатып аламын. Бала болған соң түрлі тәттілер жегісі келеді. Олар да тым қымбат.

Тіпті ауру қызды балабақшалар да қабылдамайды екен. Сондықтан оның анасы жұмысқа да шыға алмай отыр. Алматылық Ирина Грицай да осындай қиындыққа тап болған. Оның перзентінің целиакиямен күресіп келе жатқанына 7 жыл болыпты.

Ирина Грицай:

-Мұндай аурудың барын кейбір гастроэнтерелогтардың өздері білмейді. Мамандар бізге 1 жыл бойы диагноз қоя алмады. Соның кесірінен қызым бір рет өлім аузынан қалды.

Дәрігерлер бұл ауруды анықтаудың қиын екенін жасырмайды. Әрі бұл – әлем бойынша өте сирек кездесетін дерт.

Ирина Волкова, педиатр, гастроэнтеролог:

-Бар мәселе диагностикада. Аурудың өзіне тән ерекше белгісі жоқ. Сондықтан целиакияның орнына, өзге симптомдар анықталып жатады.

Қос ана қауіпті дертке биліктегілер көңіл бөлсе дейді. Өйткені онсыз да қалта көтермейтін глютенсіз тағамдардың құны күн санап қымбаттап барады екен. Сондай-ақ, балабақшаларда осындай науқастар үшін арнайы топ ашылғанын қалайды. Олар бұл өтінішін денсаулық сақтау және білім министрліктеріне жолдағанымен, қос мекеме мәселені бір-біріне сілтеген.

ҚР Білім және ғылым министрлігі:

-Целиакия ауруы білім саласындағы қызметті қажет етпейді. Сондықтан бұл сұрақ министрліктің құзыретіне жатпайды. Мәселеге жергілікті атқарушы органдар мен денсаулық сақтау министрлігі жауап береді.

Жалғыздың үні шықпасын ұққандар, енді целиакиямен ауыратын балалардың ата-аналарының қауымдастығын құрып жатыр. Әзірге ұйымға еліміз бойынша 45 отбасы қосылған.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!