Бұлар боранға қарамастан жолға шыққан ақтөбелік жүргізушілер. Дүлей жел қарды үйіріп соғып, жолды жауып тастаған. Соның кесірінен Хромтау ауданында далада қалып қойған 50-ге тарта жүк көліктерін шығарамыз деп құтқарушылар түнімен әлекке түсті.

Дүлей дауыл Орал өңірін де әлекке салды. Батыс Қазақстан облысы бойынша, екі мектеп, бір көпқабатты және бір жер үйдің төбесін жұлып кеткен.

Әсемгүл Үсенова, Орал қаласының тұрғыны:

-Адамға, машинаға қауіп төнбес үшін төтеншеліктерді шақырдым. Олар көмектесті. Бірақ КСК өздерің жасаңдар деп отыр.

Жылдамдығы секундына 17-22 метрге жеткен желден атыраулықтар да айтарлықтай зардап шекті. Тіпті пәтерлердің терезесі  жұлынып, шатырлар да қаңбақша ұшқан. Облыс бойынша үш тұрғын үй мен үш мектеп төбедегі жабындыдан айырылды. Құлаған шатыр 5 көлікті басып қалған.Құтқарушыларға қарапайым тұрғындар да көмекке келіпті. Яғни қауіпті нысандарды көргендер тиісті орындарға телефон шалып отырған.

Замир Бердашев, Атырау облыстық ТЖД бастығының орынбасары:

-Біздің қызметкерлер оннан астам қауіпті нысандарға барды. Жел күшейген кезде электр бағаналарының, ағаштардың, өзге де металдан жасалған құрылғылардың құлау қаупі болды. Дер кезінде солардың алдын алдық.

Қазір қос облыста құтқарушылар дауылдан соңғы қалпына келтіру жұмыстарын жүргізуде. Арнайы комиссия құрылып, келген шығын көлемі де есептеләіп жатыр. Ал ауа-райын болжаушылар  үш облысты әбігерге салған солтүстік-батыстан келген циклон дейді. Және де мұндай дауылдың әлі де болуы мүмкін деп ескертеді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!