Үкімет жылда трассаны тақтайдай етеміз деп, қазынадан қыруар қаржы бөледі. Мәселен, былтыр 600 шақырым жолды жөндеуге 150 миллиардтан астам теңге жұмсалыпты. Бірақ, бұдан жұрт жол азабынан құтылған жоқ. Жаңадан төселген асфальттың жылға жетпей тоз-тозы шағады. Сондықтан, депутаттар еліміздегі ірі тас жолдарда жаппай тексеру жүргізу керек деп отыр.

Нұртай Сабильянов, Мәжілі депутаты:

-Министрлік пен құқық қорғау органдары жұртшылықты, тәуелсіз сарапшыларды тарта отырып, пайдалануға берілетін автомобиль жолдарының сапасы бойынша аудит пен ревизия жүргізу қажет. «ҚазАвтоЖол» ұлттық компаниясы келісім-шарттық міндеттемелерін адал орындайтын компаниялармен жұмыс істеуі тиіс.

Өйткені, жол салатын компаниялар қалай да тапсырысты тез орындап, табыс табуды ғана көздейді. Оның сапасына бас қатырып жүрген ешкім жоқ. Басқа жолды айтпағанда, тіпті, Жамбыл, Оңтүстік Қазақстан облысындағы «Батыс Еуропа-Батыс Қытай» бағытынан да ақау шығып жатыр дейді Инвестиция министрі. Ал мынау Ақтөбе-Астрахань тас жолы. Дәл осы трассамен Ақтөбеден Атырауға да баруға болады. Бірақ, жұрт «өлім жолы» атап кеткен трассаның тегіс тұсы аз. 

Әнуар Әбутәліп, Ақтөбе қаласының тұрғыны:

-Сөз жоқ айтатын. Әбден шаршатты. Миың шайқалып кетеді ол жолдан.

Түздегі трассаны айтпағанда, шылқыған мұнайдың үстінде отырған Атыраудың өзінің іші де ми батпақ. Оны ресми мәліметтен-ақ байқауға болады. Мәселен мұндағы 200 шақырымдай жолдың жартысы жүруге жарамсыз. Жалпы, батыстан бөлек, еліміздің оңтүстік өңірлеріндегі жағдай да мәз емес. Онсыз да шұрық тесік асфальтты су шайып жатыр.

Жеңіс Қасымбек, ҚР Инвестиция және даму министрі:

-Екі-үш учаскеде болды. Қазір жаңа жобаларды жобалағанда метео, гидро жағдайларды қарап отырмыз. 20-30 жылда не болды соны қараймыз. Сондықтан, жаңа жолдарда ондай жағдай болмайды деп  есептеп отырмыз.

Яғни, Қасымбек енді тек жаңа технологияны пайдаланып жол саламыз деп отыр. Және биыл елімізде біренеше бағытта ақылы трассалар іске қосылады деді министр. 

Желтоқсаннан бастап Астана-Теміртау, Алматы-Қапшағай, Алматы-Қорғас тас жолдары ақылы болады. Олардың жалпы қашықтығы 500 шақырымға жуық. Бұл бағыттардан түскен қаржы да автобандарды күтіп, ұстауға жұмсалады екен. Ал тариф өзгерген жоқ. Жеңіл көліктер 1 шақырымға 1 теңге, жүк көліктері 10 теңгеге дейін төлейді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!