Қайғылы оқиға бүгін түнде болыпты. Аграрлық университеттің жатақханасында студенттер төбелесіп, салдарынан 1-ші курста оқитын Дидар Болысбек көз жұмған. Ал жаппай жаға жыртысуға әлімжеттік себеп болуы мүмкін. Мұны прокурор ашып айтпаса да, 7 күдіктінің ұсталғанын жеткізді. Оның екеуі тіпті кінәларын мойындап үлгеріпті.

Ербол Құлбаев, Бостандық ауданы прокурорының орынбасары:

-ҚазақҰАУ жатақханасында 1-2 курс студеттері арасында төбелес болған. Бір адам қаза тапты. Күдіктілердің бәрі анықталған. Тергеу жүріп жатыр.

Жатақханадағы төбелестен тек оқу орнының басшылары хабарсыз. Немесе мойындағылары келмейді. Тілшілерге жағдайды түсіндіруге жарамай, олардың орнына есік алдындағы күзетші ақталып әлек.

Азамат Қалмаханбетов, ҚазҰАУ күзетшісі:

-Сағат екі жарымда қасында жатқан жігіттер жедел жәрдемге хабарласқан.  Төбелес болған жоқ па?

-Ондайды көрген жоқпыз. Тып-тыныш жатақхана.

Алайда Дидардың туыстары бұл пікірмен келіспейді. Олар дені сау ұлдарын үлкен курстың студеттері сабағанына сенімді.

Сембек Қартаев, Дидардың нағашы ағасы:  

-Жабылып  ұрған. Жоғары курстың балалары жоғары курстың балаларын ұратын салт бар дейді. Әскердегі "дедавщина" сияқты.

Аграрлық университетте әлімжеттіктің өршіп тұрғанын марқұмның достары да растап отыр. Оның үстіне, Дидар бұған дейін сыныптастарына да мұңын шаққан екен.

Бауыржан, Дидардың досы:  

-Өте жақсы момын бала еді. Ешкімге зияны жоқ. Сабағын жақсы оқитын. Грантқа ілінген. Құдай бұйыртса бірінші курсты бітіріп ауылға  қайтамыз деп жүр едік.

Дидардың денесі қазір сараптамада. Оқиғаның мән-жайы соның қорытындысы шыққаннан кейін анықталады. Ал, кәмелеттік жасқа да толмаған жас жігіт ертең туған жері Таразда жер қойнына тапсырмақ. Қайғы жамылып отырған отбасы ұлдарының өліміне кінәлі жігіттерді ғана емес, осы жағдайға жол берген оқу орны басшылығын да жазалауды талап етіп отыр. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!