23 жолаушы зардап шеккен жол апаты Райымбек даңғылында болды. Нөмірі 63 бағыттағы автобус арнайы қоғамдық көлік үшін жүргізілген жолақпен келе жатқан. Ал желмен жарысқан Мерседес оны озып, оңға бұрып, кішігірім көшелердің біріне өтпек болыпты. Бірақ ол ойы іске аспай, арты апатпен аяқталды.

Жақын маңдағы үйдің бақылау камерасына сол апат сәті түсіп қалған. Онда джиптің бұрылған кезі мен автобус екеуінің соғылғаны анық көрінеді. Қатты соққыдан тіпті алып бағана майысып кеткен.

Апаттан Мерседестің оң бүйірі жапырылып, дөңгелектері сынып кеткен. Ал автобус бірден тоқтай алмай, темір бағанаға соғылыпты. 23 адам жапа шеккен. Оның сегізі бірден ауруханаға жеткізілсе, үшеуі хал үстінде жатыр. Арасында ауыр келіншек пен екі жасар бала бар.

Ләйлә Иманғалиева, Алматы қалалық Денсаулық сақтау басқармасының бөлім басшысы:

-Жеті ересек адам ауруханада жатыр, олардың жарақаттары әртірлі дәрежеде, әртүрлі сипатта. Ішінде бас жарақаттары, ушиб алған, әртүрлі жарақат алған. Бала қазір ауыр жағдайда, реанимация бөлімінде медициналық көмек алып жатыр.

Автопарктегілер апатқа бірден Мерседес жүргізушісін кінәлады. Дегенмен, тасымалдаушы ретінде жауапкершіліктен жалтармаймыз деп отыр. Арнайы сақтандырумен жарақат алғандардың әрқайсысына өтемақы төленеді деп сендірді.

Бауыржан Құлышев, «Green bus» ЖШС директоры:

-Жарақатына қарай әр жолаушы өтемақы алады. Өйткені, арнайы сақтандыруымыз бар. Ал автобустың алды зақымданыпты. Жөндеуге кеткен шығынды Гелендваген жүргізушісінен сот арқылы өндіріп аламыз.

Алдағы уақытта тәртіп сақшыларына апатқа кімнің кінәлі екенін және кімнің қалай қозғалғанын анықтауға тура келеді. Тек содан соң кімнің сот алдында жауап беретіні анық болмақ. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!