Ақжүрек Таңатаров Азия чемпионы атанды
Лондон олимпиадасының қола жүлдегері Ақжүрек Таңатаров орда бұзар отыз жасында Азия Чемпионы атанды. Ол сары құрлықтағы сайыста барлық қарсыластарын айқын басымдықпен ұтып алтын тұғырға көтерілді. Делиде өткен Азия біріншілігінен тағы үш еркін күрес шебері олжалы оралды. Бүгін балуандарды Алматы әуежайынан туған-туыс, достары және жанкүйерлері күтіп алды.
Автор: Асыл Әділханұлы
15.05.2017
Үндістанға еркін күрестен сегіз спортшы барған еді. 86 келіде Азамат Дәулетбеков финалда ирандық Алиреза Каримимашианиден жеңіліп, күміс жүлде алса, 57 келіде Нұрислам Санаев, 61 келіде Дәулет Ниязбеков қоланы қанағат тұтты. Ал, 70 келіде қарсылас шыдатпаған Ақжүрек ширек финалда моңғолиялық Хатаанбатаар Даваатсеренді, жартылай финалда жапониялық Моможиро Накамураны, финалда өзбекстандық Ихтиор Наврузовты жеңді. Айта кетейік, Таңатаров Азия чемпионатында алғаш рет медаль алып отыр.
Ақжүрек Таңатаров, Лондон олимпиадасының қола жүлдегері, Азия чемпионы:
-Бүкіл спортшының арманы Олимпиададан орын алу ғой. Енді Олимпиададаның медалі бар. Азиядадан да медаль алдық. Енді бар мақсат Әлем біріншілігін жеңу. Сол жетпей тұр.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
