Бұл – «Бала дауысы» байқауында былтыр жеңіске жеткен Мерхат Жылқыбаев пен Мария Затварницкая. Бүгін жерлестерінің алдында ән шырқап, жобаның екінші маусымын ашқан олар жақында «Жандану әлемі» қоры табыстаған жолдамамен Париждегі Диснейлендке аттанбақшы. Ал жас өнерпаздарға тәлімгерлік еткен әнші Толқын Забирова биылғы іріктеуге келушілерге сәттілік тіледі.

Толқын Забирова, әнші:

-Осы үлкен жобаға қатысып келген үміткерлердің бәріне ең біріншіден сәттілік тілегім келіп отыр. Енді жақсы көңіл-күймен, жақсы репертуармен ауырмай, сырқамай ғана аман-есен осы конкурска жетіңіздер.

Ал эстрада жұлдаздарының алдына келген жеткіншектер қазақ, орыс және ағылшан тілдерінде ән шырқады. Солардың бірі – 8 жасар Інжу.

Інжу Әлібекқызы, байқауға қатысушы:

-Менің әкем әскери адам және мен әскери ән айтамын. Мен әділ қазыларды әскери әніммен таң қалдырмақпын.

Ал жоба ұйымдастырушыларының айтуынша, биылғы маусым ерекше болмақ. Республика бойынша іріктеуден өткен он алты балаға жасына сай жаңа ән жазылады. Олар алдымен тәлімгерімен, кейін жеке өзі қазақ және шет тілінде ән шырқайды. Тек осыдан соң ең үздік орындаушы анықталмақ.

Жұбаныш Жексенұлы, әнші:

-Мынау Естай туған өлкеде өнердің, жалпы әннің, ән сүйер ел орналасқан киелі мекенінде тағы да бір әнші жүрген шығар. Ертең сол бір жас жеткіншек болашақ жұлдызымызды үлкен әлемдік деңгейде ән айтатын тағы бір баланы табатын шығармыз. Осындай үміт бір, сенім бар.

Республика бойынша жас өнерпаздарды іріктеу маусымның 22-сіне дейін жалғаспақ. Әнші-сазгерлер енді Өскемен қаласына аттанады. Ал жобаның ақтық кезеңі қазанның 27-29-ы күндері өтпек. Еліміздегі тұңғыш ұлттық ән байқауы 2-ші қыркүйектен бастап КТК арнасынан көрсетіледі. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!