Настяның ата-анасы Балықты өзенінің жағасындағы «Мерекелік» саяжайында тұрады. Шошқа өсірумен айналысады. Оқиға болатын күні бүлдіршін інісі Романмен бірге торайлармен ойнап жүріпті. Анасының сөзіне қарағанда, ол шаруаларымен үйге 5 минутқа кіріп кетіп, қайта шыққанда қызын таппай қалған.

Марина Демочкина, Настяның анасы:

-Бәлкім, қызым тірі шығар. Өтінемін, әлеуметтік желі арқылы таратыңыздаршы. Бір жерде жүрген шығар, тым кішкентай ғой. Небары 3 жаста.

Настя жоғалғалы бері Демочкиндердің үйіне бас сұғатындар көбейген. Қала тұрғындары да қарап қалмай, қол ұшын созып жатыр. Ал ерлі-зайыптылардың туыстары өңірдегі мен деген балгерлерді жағалап шығыпты.

Анна Демочкина, Настяның әпкесі:

-Экстрасенстерге бардық, табасыңдар, тірі дейді. Тіпті сенуден қалдық. Жаңа тағы біреуі телефон соғып, үйіндінің астынан табасыңдар деді.

Қазір Настя Руденконы іздестіру жұмыстарына сүңгуірлермен бірге еріктілер де кіріскен. Барлығы 60 шақты адам сенбіден бері 200 шақырым жерді шарласа да, әзірге бүлдіршіннен бір хабар болмай тұр.

Азамат Жұртбаев, Алматы облыстық ТЖД ресми өкілі:

-Бірінші топ Талдықорған қаласынан платинаға дейін іздеп жатыр. Екінші топ Үштөбеден жоғары қарай Қаратау өзенінен жоғары қарай кетті.

Алматы облысында осы айда бұған дейін балалар екі рет суға кетті. Мысалы, мамырдың 8-і күні Райымбек ауданында бір үйдің 3 баласы арыққа батып кеткен еді. Және дәл сол күні Ескелді ауданында да 13 жастағы екі қыз суға кетіп, олардың денелері келесі күні табылған болатын.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!