Тілі мүкіс баланы ұрып оқытқан екібастұздық логопедке қатысты қылмыстық іс қозғалды
Енді ашушаң ұстаз жазаға тартылуы мүмкін. Сондай-ақ, білім басқармасындағылар оның балабақшадағы жұмысынан қуылатынын айтып отыр. Тіл маманынан таяқ жеген 3 жасар Юраның жағдайын тілшіміз Әйгерім Шакаманова біліп қайтты.
Автор: Әйгерім Шакаманова
17.05.2017
Юра қазір маңайына ата-анасынан өзге ешкімді жолатпайды. Бұған жақында болған оқиға себеп. Тілінің мүкістігі бар бүлдіршінді логопедтің ұрып-соғып оқытқаны мына кадрларда анық көрінеді. Ұлының бойынан үркектікті байқаған анасы үйге келіп сабақ беретін ұстаздың бұл қылығын осылай түсіріп алған.
Анастасия Безукладникова, Юраның анасы:
-Бастапқыда балам жылайтын. Логопед бұл бөтен адамға үйренген соң басылады деді. Кейін ұлым оны көргеннен-ақ жылауды шығарды. Бұдан соң әжесі маманның ұрысқанын естіпті. Ұстаз кезекті рет келгенде компьютердегі вебкамераны қосып қойдым. Баламды ұрғанын көргенде өзімді қоярға жер таппадым.
Ғаламторда тараған бұл бейнежазба басқаларды да алаңдатып отыр. Екібастұздықтар осы жайтқа шаһарда арнайы орталықтың жоқтығы себеп дейді. Енді тілі мүкіс балалардың ата-аналары қайда барарын білмейді.
Марал Бекмергенова, Екібастұз қаласының тұрғыны:
-Сөйлей алмайтын балаларға орталық ашса керемет болушы еді. Балабақшаға апаратын мысалы мақсатымыз бар. Балабақшада оны қалай тәрбиелейді тәрбиешілер. Ұрып-соғу деген фактілер бар болса, мен оны қалай дәлелдеймін? Оны қалай көрсете алам? Камералар жоқ.
Ал бүлдіршінді желкеден ұрып оқытқан логопедтің өзі жеке сабақ берумен қоса балабақшада жұмыс істейтін көрінеді. Еңбек демалысына кеткен оны енді білім бөліміндегілер жазалаймыз деп отыр.
Нұржамал Мақұмова, Екібастұз қаласы білім бөлімінің басшысы:
-Қазіргі уақытта бұл мұғалім кезекті еңбек демалысында. Еңбек демалысынан шыққан кезде бұл мұғаліммен келісім-шарт бұзылады.
55 жастағы ұстаздың өзі хабарласқанымызда ауырып қалғанын айтып, кездесуге келмеді. Білім саласында 18 жылдан бері еңбек етіп жүрген ол, екі жыл бұрын логопед мамандығы бойынша білім алған екен. Ал оның үстінен полицияға шағым түсірген ата-ана жауапқа тартқызбай қоймаймыз деп отыр.
3 жасар Юраның өзі қатты шошып қалғаны болмаса дін аман. Оның психикалық соққы не дене жарақатын алған-алмағаны арнайы сараптамадан соң анықталмақ. Ал бүлдіршінді ұрып оқытқан логопедке қатысты қазір қылмыстық іс қозғалған.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!