Алты баласы бар Баян Нұрмағанбетованың ас-ауқаты – жарты бөлке нан мен қарызға алған титімдей ғана май. Мектеп жасындағы 4 қызы жұрттан қалған киім-кешекті киіп, оқу жылын әупірімдеп аяқтапты. Үйі-күйі жоқ отбасының шалғайдағы ауылдан Кентауға келіп, жұмыс кезегіне тұрғанына 5 жыл болған. Содан бері күйеуі екеуінде де жұмыс жоқ. Үйге де зар.

Баян Нұрмағанбетова, көпбалалы ана:

-Қақпаған есігім жоқ. Міне, алатын 8 мың теңгем жетпейді 6 балама. Қай жаққа баратынымды да білмеймін. Не істерімді де білмеймін?

Осылай секілді өлместің күйін кешіп жүрген көпбалалы отбасылар бұл қалада баршылық. Бүгін солар амалсыздан әкімдіктің алдына жиылды. Себебі, мемлекеттік жәрдемақыға ғана қарап отырған отбасыларға сол көмектің өзі айлап кешігуді шығарған.

Айнұр Айтбаева, көпбалалы ана:

-Айлығым 13 мың теңге. 14 мың теңге күміс алқаның ақшасы.

Жұрт шулаған соң әкімдік ғимаратынан атып шыққан шенеуніктер әйелдерді әупірімдеп жүріп ішке кіргізді. Бірақ басу айтқан әкім орынбасарын тыңдар құлақ болған жоқ. Ал шенеуніктің сөзіне сенсек, аналардың айқайына еш негіз жоқ.

Нұржан Тәшімов, Кентау қаласы әкімінің орынбасары:

-Заң бойынша, айдың соңына дейін берілуі керек.  31-не дейін алу керек. Бұл әлеуметтік осал топ.Сосын дүкенде жиналып қалған өздерінің тұрмыс қажеттерін болу керек.

Көп балалы аналар болса, әкімнің шығуын талап етіп, орынбасарларының сөзіне сенбестік танытқан. Әйтсе де, қала басшысы шыққан жоқ. Ал көпбалалы аналар жәрдемақы екінші ай кешігер болса құзырлы орындарға арыз жазбақ. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!