Германияда тағы атыс болды

Германияның Мюнхен қаласындағы станциялардың бірінде бүгін атыс болды. Салдарынан полиция қызметкері мен бірнеше жолаушы жарақат алған. Жұртқа қару кезенген қаскөй де алысқа ұзай алған жоқ. Ол ақыл-есінде ауытқу бар жергілікті тұрғын екен. Жол-жөнекей жолаушылармен жанжалдасқан оны Унтерферинг станциясында полицейлер тоқтатып, құжатын тексеріпті. Кикілжің сол жерде басталған. Қаскөй тәртіп сақшысының тапаншасын тартып алып, бей-берекет оқ жаудырған.