Ыбраевтар отбасының кенжелері Аман мен Есеннің екі жыл бұрын көздері қылилана бастапты. Биыл олар квота бойынша Астанада ота жасатқан. Ал, операциядан соң жіптерін алу ақылы екен. Елорадық дәрігерлер бұл қызметті жергілікті мамандар тегін көрсетеді деп үйлеріне қайтарыпты.

Уәлихан Ыбраев, Петропавл қаласының тұрғыны:

-Балалардың көздеріндегі жіпті бір ай бойы алдыра алмадық. Талап бойынша бұл шара он күнде жасалуы тиіс. Жергілікті  дәрігерлер «балалар анестизиологы жоқ»  деп созбалаңға салды. Ұлдарым  түнде жатса да, таңертең тұрса да жылап, мазаланып жүрді.

Отбасы Астанаға қайта-қайта телефон шалған соң ғана бұл мәселе жуырда шешілген. Балалар анестизиолыгын басқа ауруханадан алдырған мамандар егіздердің көзін отадан қалған жіптен арылтыпты. Бұған, бірінші кезекте маман тапшылығынан себеп дейді шенділер. Қазір облыс бойынша 316 дәрігер жетіспейді. 

Владимир Безлер , СҚО денсаулық сақтау басқармасының басшысы:

-Неанатолог, құлақ мұрын, көз дәрігерлері жетіспейді. Әсіресе, ауылдық жерлерде жағдай қиын. Әр ауданда кем дегенде бес-алты дәрігерден тапшы.  

Ауылдық жерлерде жас дәрігерлерді ұстап қалу үшін қазір түрлі әлеуметтік жобалар жасалуда. Мысалы теріскейге келіп, дәрігер болған жанға жарты миллион жәрдемақы мен бір жарым миллион теңге баспанаға деп ақша беріледі. Бірақ осының өзінде бұған қызығып келіп жатқан маман жоқ. Ал өзге аймақтарда мұндай көмек мүлде қарастырылмаған. 

Айгүл Қаптағаева, ҚР  Денсаулақ сақтау министрлігінің департамент басшысы:

-Дәрігер жетіспеушілігінің негізі себебі жергілікті жерлерде, әсіресе ауылдарда оларға әлеуметтік көмек көрсетілмейді. Сондықтан мамандар тұрақтамайды. Біздегі мәлімет  бойынша жоғары оқу орнын бітіргендердің 92 пайызы өз мамандықтары бойынша қызметтерін бастайды. Алайда олардың жартысы осындай көмек көрмегендіктен жұмыстарын тастап кетіп қалады.

Денсаулық сақтау министрлігінің мәліметінше, елімізде жалпы 3 мыңнан астам дәрігер жетіспейді екен. Ең қиын жағдай Қазақстанның солтүстігі мен батысында. Мәселен, Қостанайда 190, Солтүстік Қазақстанда 316 дәрігер жетпесе, Маңғыстауда 338 маманның орны бос. Алматы қаласы бойынша бұл көрсеткіш 265, Елордада 221 маман тапшы.

Бұл тығырықтан шығу үшін аймақтардағы шенділер жыл сайын медициналық жоғары оқу орындарырың студенттерімен кездесіп, өз облыстарына шақырады. Солтүстік Қазақстанға да биыл 90 маман келеді деп күтілуде. Олар мемлекет есебінен білім алғандықтан, жолдама бойыша жұмыс істеуі тиіс. Бірақ оның мерзімі біткен соң, маманның бұл жерде қалу-қалмауы екіталай.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!