Кеше ғана ақтық сапарға шығарып салған Рахат Қаметаевтың туыстары әлі жақындарынан айырылып қалғанына сене алар емес. Қайғыдан қан жұтқан отбасында бұл өлім марқұмның кенжесі 9 жастағы Бағланға қатты тиген. Ол - бой жетіп қалған қос қыздан кейінгі жалғыз ұл. Ал ересектер балалар әкесінің ерлігін мақтан тұтатындай естелік болса екен дейді.

Мағиза Райымжанова, марқұм Рахат Қаметаевтың анасы:

–Егер  барлығы жарылса, бүкіл әуежай кетті ғой. Одан артық қандай батырлық керек?! Ол өзін ойлаған жоқ. Бұрамағанда пәленбай тонна керосин атылар еді.

Рахат Қаметаевтің 38 жастағы әріптесі – Рустам Мұсабеков осымен төртінші күн ес-түссіз жатыр. Өйткені, алған жарақаттары жеңіл емес. Денесінің 87 пайызын, ал тыныс жолдарының 30 пайызы күйіп қалған.

Қанат Әбдірахманов, Талдықорған қалалық көпсалалы аурухана бас дәрігерінің орынбасары:

-Қазір жансақтау бөлімінде жатыр, 1975 жылы туылған. Бізде жатқанына 4 күн болды. Қал-жағдайы өте ауыр, бірақ керекті ем алып жатыр. Алматыдан мамандар келді, керек көмекті көрсетті.

Ал өрт болған жанармай құю бекетінде тек толығымен жанып кеткен техника ғана тұр. Адам өліміне алып әкелген тілсіз жау өткен бейсенбіде тұтанған екен. Екі жігіт болмағанда, өрттің салдары әлдеқайда ауыр болар еді дейді жауаптылар.

Қалмұхамет Дөңсебаев, «Жетісу» әуе компаниясының президенті: 

-Оларға қашып кетуге де болар еді. Ол кезде өте қиын жағдай болар еді. 600 тоннаға жуық керосин жарылып, өртеніп, арты не боларын бір құдай біледі.

Ал 5 күн өтсе де, сол апаттың себептері әлі анықталмай жатыр. Қазір оқиға орнында көлік прокуратурасы мен еңбек инспекциясының мамандары тексеріс жүргізуде. Оның қорытындысы бойынша, жапа шеккендердің отбасына өтемақы беру мәселесі шешілмек. Қазірше, тек облыс әкімдігі қаза тапқан Рахат Қаметаевтың отбасына 1 млн теңге берген. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!