-Саналы ауылындағы мектеп құрылысы басталмай жатып-ақ дауға қалды. Себебі, келер жылы пайдалануға берілуі тиіс оқу ордасы 150 балаға арналған екен. Ал, ауылда қазірдің өзінде 300-ге жуық оқушы бар. Сондықтан, тұрғындар құрылысты тоқтатсын деп талап қоюда.

Ескі ғимаратты мектеп етіп, үш ауысыммен оқып келе жатқан жұртқа биыл ғана әкім есеп беріпті. Ол кезде 3 гектар жерге 250 орындық мектеп, тіпті спорт зал салынады деп сүйінші сұраған. Алайда, 2 ай өтпей 3 гектар жер бір жарым есеге, ал 250 адамдық нысан 100 орынға қысқарып кеткен.

Пернекүл Рүстемова, Саналы ауылының тұрғыны:

-Сонда бала-шаға асфальттың үстінде жүре ма? Машинаның астында қала ма сонда?  Ереуілге шығамыз.  

Жалпы Арысқа қарасты ауылдарда мектепті шағындап салу үрдіске айналған. Саналы ауылына көршілес елді-мекендерде де бала саны азайтылып, мектептер тарылып кетіпті. Көз алдындағы мысалды көрген жұрт жаңа мектепке бала жіберілмейді деп отыр.

Бердалы Нұрәлиев, Саналы ауылының тұрғыны:

-Іргедегі ауылдан 150 орындық мектептің қандай болатынын көріп келдім. Барып қарасам бір класта 6 партадан. Химия, физика, биология кабинеттерінің бәрін көрдім. Сөйтсем 6 партадан 12 баладан артық сыймайды. Бұл не масқара?

Дауласқан жұртқа түсіндірмек болып шенеуніктер келгенімен, жұрт жаудырған сұрақтарға жауап таппай олар әбден састы. Құрылыс бөліміндегілердің айтуынша, мектеп мәселесі 2009-шы жылы көтеріліпті. Құжат жасалып, қаржы бөлінем дегенше 8 жыл өтіп, бала санының артып кетерін білмедік деген олар, енді бекітілген мектеп не болса да салынады деп отыр.

Темірхан Сатыбалды, Арыс қалалық құрылыс бөлімінің басшысы:

-Облыстан бюджеттен бөлінді. Жоба дайын тұр. Оны біз енді қалдырып кете алмаймыз. Өйткені қаржы бөлінді бұған.

Бюджеттің 386 миллион теңгесіне салынып жатқан мектеп, онсыз да 3 ауысымнан зәрезап болған ауыл тұрғындарының мәселесін шеше алмайтын түрі бар. Сондықтан, жұрт, облыс пен астаналық шекпенділерден сауға сұрап отыр. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!