Жылқының осылай жаппай қырылуы бұл ауылда 35 жыл бұрын болған екен. Бірақ, сол кезде де аурудың емі табылмаған еді дейді тұрғындар. Қазір де жылқылар шетінен арам қатып жатыр.

-Мынау екі көзі атып кетіп, мұрнынан қан саулап тұрғандағысы...

Қыруар малдан айрылып, қылар қайраны болмай діңкесі құрыған қараша қазір шарасыз күйде. Өйткені, қырылған жылқы жүздеп саналады. Және күн сайын көбейіп барады.

Бекежан Қалешев, Исатай ауданының тұрғыны:

-Бірінші бастағанда мұрнынан қан кетіп, артынан көзі атып кетті, аяқтары маймиып қалды, бауыры ісіп кетті, іштерін жарып қарадық, қарны қанталап кеткен кейбірінің...

Нұрлан Жұбаев, Исатай ауданының тұрғыны:

-Мына жердегі халықтың бәрі 200 бастай жылқы жоғалтты. Жұқпалы зат мынау дейтін. Басында тұмау, сақау ма деп жобаладық, оған қарап тұрған жоқ.

Айта кету керек, қажетті екпені де жылқышылар жүз мыңдап өз қаражаттарына сатып алып отыр. Исатай ауданына қарасты Үшқызыл елдімекеніндегі 20-дан астам шаруа қожалықтарындағы жағдай осы. Белгісіз дерттен қырылып жатқан жылқы малының өлексесі айналада шашылып жатыр. Қазірдің өзінде 200 басқа жуық арам қатқан. Мал иелерінің айтуынша, белгісіз ауру енді сиыр мен түйеге де ауыз сала бастапты.

Ал, жергілікті және облыстық ветеринарлар шара қолданбақ түгілі, шаруаларға оның себебін де түсіндіріп бере алмай отыр. Есесіне маман болмаса да, әкімдіктегілер өз уәжін айтты. Олар ауру белгісі сәйкес келмесе де, жылқылардың сақаудан қырылып жатқанына сенімді. Қатталған цифларға сенсек, жағдай бақылауда көрінеді.

Серік Ерментаев, Атырау облыстық әкімдігінің ресми өкілі :

-Мал дәрігерлері ауру малды оқшаулап, емдеу және өлгендерін жою жұмыстарын жүргізуде. Жағдайды жергілікті әкімдік бақылауда ұстап отыр. Қазіргі кезде 234 бс жылқы ауырып, оның 96-сы ғана өлді.

Өкінішке қарай, әкімдіктегілер малдан айырылған халыққа төлененер өтемақы мен, карантиннің жарияланатынын ашып айта алмады. Ал, тұрғындар өздерінен 60 шақырым қашықтықта орналасқан сынақ алаңынан зардап шегіп отырғандарына сенімді. Сондықтан Астанадан арнайы комиссияның келіп, осындағы су мен жайылымнан және ауадан сынама алып, кешенді тексерістің жүргізілуін талап етуде.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!