Велоспорттан Қазақстан құрамасының мүшесі Дина Ахметова Алматыға жастардың 4-ші спорттық ойынына қатысу үшін келген. Солтүстіктің намысын қорғап жүрген жас талант оқу-жаттығу барысында есінен танып құлапты. Дереу жедел жәрдеммен бірден ауруханаға жеткізілген. Алайда, бірнеше күн хәл үстінде жатып, ақыры тілге келместен көз жұмды.

Марат Абдуллаев, №7 қалалық аурухананың бас дәрігері:

 -Организмнің сусыздануы. Соған байланысты бұл бала қиын жағдайға келген. Одан кейін бауыры, бүйректері басқа органдары зақым алған. Біз барлық мамандарды жинап консилиум өткіздік. Бірақ бес күннен кейін бала шетінеп кетті.

Мамандар спортшыға күн өткен деп отыр. Ағзасындағы суы азайып, кей мүшелері жұмысын тоқтатқан. Алайда Динаның туыстары бұл пікірмен келіспейді. Олар қайғылы жағдай жарысты ұйымдастырушылардың салғырттығынан болды деген пікірде. Себебі, қыз есінен танып құлағанда оған алғашқы көмек көрсетілмепті.

Жанболат Ахметов, Дананың әкесі:

-Оның денсаулығы өте жақсы болған. Өзі ұлттық құраманың мүшесі ғой. Мықты еді. Жаттықтырушысы одан әлем чемпионын шығарам дейтін. Бірақ өкінішке қарай ол арман орындалмады.  

Он төрт жасында спортқа келіп үш жылда біраз белесті бағындырған Дина Ахметоваға бапкерлері расымен де үлкен үміт артқан екен. Ол 2016 жылдан бастап олимпиадалық даярлау тізіміне кіргізілген. Қазір қыздың денесіне сараптама жүргізіліп жатыр. Кейін оны жерлеу үшін туған өңірі Қызылжарға алып кетеді.   

Бізді Youtubе-та қараңыз! Бізді Facebook-та, Instagram-да, Telegram-да оқыңыз!