Қайғылы оқиға Талдықорғандағы нөмірі бірінші балабақшада болды. Құлдыраңдап шауып жүрген құлықшақтардан түс ауа маза кеткен. Бұны тәрбиешілер де байқапты. Бірақ жедел жәрдем шақырмаған. Кешке дейін ата-ананы күтіпті. 

Марина Мәмбетова, № 1 балабақшаның меңгерушісі:

-Демалысқа жатқызғаннан кейін сағат екі жарымда температурасы көтеріледі. Келіп маған медсестра айтты температурасы көтерілді деп. Мамасына қайта-қайта звондап едік телефонына жауап бермеді. Кешке анасы келді. Бәрін айтып едік нөмірімді ауыстырдым деп кешірім сұрады.

Жасы төртке де толмаған ұл баланы анасы да үйге апарып өзі емдемек болған. Одан жағдай өзгермейді. Ал түнгі үштер шамасында аураханаға жеткізеді. Бірақ  жарты сағатта бала шетінеп кеткен. Ауруы асқынып түскен екінші бүлдіршінге дәрігерлер барлық ем-домды жасап жатыр. 

Олег Ким, дәрігер:

-Бұл бала 29 күні қызуы көтеріліп, басы ауырып, жүрегі айнып түскен. Менингит деген диагноз қойылды. Барлық емді жасап жатырмыз. Қазір жағдайы орташа.

Алматы облысының орталығындағы мемлекеттік балабақшада болған бұл оқиға талдықорғандық ата-аналарды алаңдатып отыр. Нөмірі бірінші мектепке дейінгі мекемеге бұған дейін 265 бала барып жүрсе, бүгінде оның тек 35 сі қалған. Алайда қалалық білім басқармасы дүрлігуге себеп жоқ деп отыр. Олар бір тәрбиеленушісі қайтыс болып, енді бірі ауруханада жатқан балабақшаға тексеріс жүргізіп, ешқандай кінәрат таппапты. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!