Хәл үстінде жатқан Екатеринаның сөйлеуге де зауқы жоқ. Үш жерден сынған жамбас сүйегі тұрып-отыруға да мұрша бермейді. Ауруханаға келгелі төсекке таңылған қыз оқиғаның қалай болғанын да дұрыс білмейді.

Екатерина Белоусова:

-Үлкен-үлкен ауыр құбырлардың құлап келе жатқанын білем. Одан соң біреуден әкеме телефон соғуын сұрағаным есімде. Одан басқа не болғанын білмеймін. Қазір ауырғанды басатын дәрінің күшімен жатырмын.

Бірақ бұл оқиға сол маңайдағы машиналардың бірінің бейнебақылау камерасына түсіп қалыпты. Ірі жүк көлігі даңғыл бойынан солға бұрылмақшы болғанда арқасындағы ауыр темірлердің салмағы ауып, жол жиегінде тұрған Екатеринаны қағып түсірген. Тек үстінен түгел басып қалмай, содан аман қалыпты. Бойжеткенді күнделікті бақылауға алған дәрігерлер оның ағзасының дұрыстап күш жинауын күтіп отыр. Сөйтіп, бірер күнде ота жасамақ.

Дәурен Түсіпов, Алматы қалалық №4 ауруханасының бөлім меңгерушісі:

-Жамбас сүйектерінің сыртқы фиксациясы жасалынған, орнатылған аппарат. Енді жақын уақытта, бір аптаның ішінде жамбас сүйектерін ішкі металфиксаторлармен бекітіп қоямыз сүйегін. Одан кейін бұл науқас 1,5-2 айдай балдақ қолдану керек болады.

Алматылық қызды ауыр жағдайға түсірген жүк көлігі Тараздан келе жатқан беті екен. Үстіндегі темір құбырларды Алматының шетіндегі мұнай базасына жеткізуі керек болыпты. Сонша жерден аман жеткен жүргізушінің өзі де мұнша қателікке ұрынғанына сенбей жүр.

Кирил Гуляев, жүк көлігінің жүргізушісі:

-Шамамен бес жүз шақырымдай жолды аман-есен жүріп келгенмін. Соңғы бір шақырымдай ғана жол қалған еді. Құбырлардың салмағы артық болған жоқ, сым темірмен жақсылап байланған болатын. Бұрылыстан жай жүріспен-ақ өткендей едім. Бұлай боларын кім білген.

Қазір бұл оқиғаға қатысты тергеу жүріп жатыр. Ал жүргізуші жігіт ем-домның бар шығынын қазірден өз мойнына алған. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!