Бұл ауылдың тұрғындары әкімін көрсе болғаны, амандасудан бұрын «ауыз су қайда?» деп сұрайды. Жеті жылдан бері тіршілік нәріне жарымаған жұртшылықтың ашынғаны сонша, халықпен кездесуге келген шенеуніктің басына шелек кигізе жаздады.       

Таза су сұрап тұрғындардың тамақ жыртуы бекер емес екен. Судың тапшылығы салдарынан жұрт дуанаға айналған. Қолдарына шелек, басқа да ыдыстарын ұстап, көрші ауылдағы құдықтарды аралап кетеді екен.      

Айтбазар Смаров, Қарабұлақ ауылының тұрғыны:

- Бақшада су таза болу керек. Бұлар анау бастаудан алып келіп ішеді. Ол су бола ма?Су болмайды ол. Балалар ауырса ертең не болады?

Ал қариялардың көрген күні, тіпті, қиын. Алыстан су тасып ішуге жарамайтындықтан, ауылдағы суы лас жалғыз құбырды місе тұтып жүр. Оның өзіне су кейде келіп, кейде келмейді екен.   

Вера Лебедева, Қарабұлақ ауылының тұрғыны:

-Су келгенде ғана аламыз. Басына күніне бірнеше мәрте барып қарап қайтам су келді ме, жоқ па деп. Енді осылай бола ма? Әәбден қиналдық. Жөні дұрыс құбыр тартып берсе екен.

Төрт жүз түтіні бар Қарабұлақ ауылында құбыр атаулы тозып, жеті жыл бұрын істен шығып қалған екен. Кеңестен қалған көнені ауыстыруға содан бері ешкім құлық танытпапты. Тек осы жыл басында ғана бюджеттен бақандай 109 миллион теңге берілген екен. Бірақ ауыл атқамінерлері оны әлі күнге дейін ұқсатпапты.   

Еркін Жиендин, Қарабұлақ ауылы әкімінің міндетін атқарушы:

- Биыл бір арықтар бар. Насоспен  суғарып жатыр. Бірақ, біз жаңадан арық жүйесін саламыз. Бастаймыз биыл.

7 айда дайын болмаған сметаны осы жетіде қатырамын деп сөз беріп құтылды ауыл әкімі. Бірақ, шелек ұстағандардың ешқайсысы да оған сенген жоқ. Өйткені Қарабұлаққа басшы болғандардың бәрі осылай семіз сөйлегенімен, одан су ауылға келмеген.                       

Бізді Youtubе-та қараңыз! Бізді Facebook-та, Instagram-да, Telegram-да оқыңыз!