Кеңес ауылына жақын Көделі жайлымының сай-саласында жануарлар сеспей қатып жатыр. Тек соңғы екі апта ішінде бір ғана шаруа қожалығынан 7 бас жылқы құлынымен және бір сиыр бұзауымен арам өлген. Ал, бүгін ауырып жайлаудан әкелінген бие пышаққа түсіп отыр.

Жұпаркүл Әлімбетова, Кеңес ауылының тұрғыны:

-Іші шарбақтай болады. Небір ішектер шығады ішінен. Ештеме жемейді. Суды ішкенде жалайды да қояды. Арам қатып көбеліде жатыр.

Ауылдықтар жылқының неден өлгенін нақты білмегендіктен оның етін де алғысы жоқ. Сондықтан мал иесі жануардың етін 40 жілікке бөліп, тек ет жақындарына таратуға мәжбүр. Белгісіз дерт әлі талай шаруаны шығынға батыратын түрі бар. Өйткені ауырып, қорада тұрған мал көп.  

Сейсенбай Қотанбаев, Кеңес ауылының тұрғыны:

-Екі мал өлді . Біреуі бүгін түнде өлді. Бір апта болған ауырғанына. Сейсенбі күні қанын алып қан жібердік ауданға. Нәтижесі әлі жоқ.

Мына көделі жайылымының 20 гектар алқабына аяқ басқан жан-жануар арам қатады дейді шаруалар. Айтуларынша, осыдан бір ай бұрын қаптаған шегірткелерді өлтіру үшін дәрі-дәрмек себілген екен. Алайда жағдай керісінше болды дейді малшылар. Яғни, зиянкестердің көзі жойылудың орнына көбейіп кетсе, уланған аумаққа жайылған төрт түлік қырылып жатыр екен. Мәселен мына жылқы өрісте жүріп өлген. Арам қатқандықтан етін де жеуге жарамсыз.

Ал, құзырлы орындар әзірге нақты ештеңе айта алмауда. Сөздеріне сенсек, сараптама қорытындысын күту қажет. Бірақ, тексеру нәтижесі шықпаса да, мамандар аурудың жұқпалы еместігін біліп қойған.   

Оспан Бердияров, Жамбыл облыстық ветеринария басқармасының басшысы:

-Жұқпалы емес.Шөптен де болуы ықтимал. Шегірткеге дәрі шашыпты одан да болуы ықтимал. Қазір енді жағдай жасалып жатыр. Тексерілуде бәрі.

Енді берер күнде малдың неден өлгені белгілі болады. Егер жануарлар шегірткені улауға себілген дәріден қырылса, онда шаруаларға өтемақы берілмек. Егер дерттің себебі басқа да болса, көк тиын өндірілмейді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!