Сәйкестендірудің жаңа түрі тікелей селфимен байланысты. Енді банкте кез-келген қаржы операциясын жүргізу үшін ПИН-код пен құпия сөзден бөлек, өз-өзіңді суретке түсіру міндетті болмақ. Әйтпесе, банкоматтан ақша да ала алмайсың, несие де рәсімдей алмайсың. Ал ол үшін алдымен қаржы ұйымының бөлімшесіне барып, төлқұжаттағы суретті базаға енгізу керек.

Сол ресми сурет пен селфи сәйкес келсе ғана, банк қызметін әрі қарай қолдануға рұқсат. Мұндай жүйені ресейлік банктер тәжірибе ретінде енгізіп үлгерген. Әрі ол сынақтан сүрінбей өтіпті. Сондықтан қаржы ұйымдары сурет арқылы сәйкестендіруді барлық бөлімшелерінде іске қоспақ.

Дмитрий Забелло, ВТБ (Қазақстан) банкінің басқарма төрағасы:

- Жүйе тестілеуден сәтті өтті. Сондықтан, ол жыл соңына дейін ВТБ24-тің барлық бөлімшесінде жұмыс істейтін болады. Біз де сол банктің еншілесі болғандықтан, селфи сәйкестендіруді енгізу мәселесін қарастырып жатырмыз.

Банкирлер міндетті сәйкестендіру Қазақстанда келесі жылдан бастап жұмыс істейді деп жоспарлап отыр. Мұның бәрі соңғы кездері қаптап кеткен хакерлерге қарсы тұру үшін қолға алынған. 

Олегжан Бекетаев, «Сбербанк» АҚ еншілес банкі маркетинг және коммуникация басқармасының директоры:

- Жаңа жүйе тіпті егіз адамдарды бір-бірінен ажырата алады. Клиенттер селфиді сол сәтте жасауы керек. Алдын-ала түсірілген сурет жарамайды. Сәйкестендірудің бұл түрі алаяқтардың құйтырқы әрекетіне жол бермейді.

Тек сарапшылар бұған үлкен күмәнмен қарап отыр. Айтуларынша, селфи сәйкестендіру кибералаяқтарға тиісті деңгейде төтеп бере алмайды.

Олжас Сәтиев, кибершабуылды талдау және тексеру орталығының президенті:

- Қазір адамдардың бет әлпетін өзгенікіне айнытпай өзгерту қиын емес. Ал, хакерлердің қолынан келмейтіні жоқ. Селфи сәйкестендіру алаяқтардың өзгенің атынан оп-оңай несие алуына жол береді. Сондықтан жүйені әлі жетілдіру керек деп ойлаймын.

Әдетте селфи жасағанды ұнататын азаматтар да, жүйе енгізілмей жатып, қарсы шығып жатыр. Олар көптің көзінше өз-өзіңді суретке түсіру ыңғайсыз екенін айтады.

- Банкке барып селфи жасап тұру бір жағынан да дұрыс емес. Ақылға қонбайтын іс қой.

Ал ресейлік қаржы ұйымдары биометриялық сәйкестендірудің өзге де түрлерін дамытпақ. Мәселен, алдағы уақытта клиенттің нақты өзі екенін дауыс, саусақ, алақан таңбасы арқылы тексеру жүйесі де енгізілуі мүмкін. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!