Бұл үйді алу үшін үлескерлер 7 жыл ақша құйған. Сөйтіп, 2014 жылы көшіп келіпті. Тек қоныс қойын тойлай сала, өздері құрылысқа қайта кіріскен. Өйткені, нысанның сапасы о баста төмен болған екен. Ал, кеше үйдің сыртқы қаптамасы опырылып түсті.

16 қабатты нысанның сылағы желге төтеп бере алмай, жоғарыдан төменге дейін үгітіліп түсе беріпті. Әрі желмен жан-жаққа ұшқан. Ал, сол сәтте мұнда кішкентай балалар ойнап жүрген екен.

Құдай сақтап, зардап шеккен адам жоқ. Десе де, жоғарыдан түскен құрылыс материалы 4 көлікті бүлдірген. Қазір оның иелері шығынды кімнен өндіріп аларын білмей жүр. Тұрғындар қаптаманың құлайын деп тұрғанын талай айтып, дабыл қағыпты. Бірақ құлақ асар жан табылмаған. 

Байбек Қадырқұл, Алматы қаласының тұрғыны:

- КСК-ға да айтылған. Олар шара қолданған жоқ.

Сыртқы сылақтың қалған бөлігі де әні-міне құлағалы тұр. Бірақ, сонда да қауіпті жер әлі қоршалмаған. Жан-жағында балалар емін-еркін ойнап жүр. Алаңдап келген бірде-бір шенеунік жоқ. Тіпті, үйге кімнің жауапты екені де түсініксіз. Тұрғындар құрылыс компаниясы мен пәтер иелері кооперативін кінәләйді. Ал, олар бір-біріне сілтеп отыр.

Қазбек Әшіров, кооператив төрағасының орынбасары:

- Құрылысшы шатырға 7-10 жыл, үйдің фасадына 10-15 жыл кепіл беруі керек. Жағдайды көріп тұрсыздар. Бұл жерде құрылыс компаниясы кінәлі.

Ал, үйді тұрғызғандардың өз уәжі бар.

Әбдірахим Жақаев, құрылыс компаниясы директорының орынбасары:

- Келісімшарт салынған үйлерге 2 жыл гарантия беріледі. Мына үй 2013 жылы салынып біткен. 2013 жылдан бері міне 4 жыл өтті. КЕпілдің мерзімі  бітіп кетті.

Енді екі тарап сотта кездеспекші. Соған қарағанда, үйді қайта жөндеуге қай-қайсы да әзір кіріспейді.

- Ал, тұрғындардың қорқынышы сол күйі басылған жоқ. Өйткені, үйдің қалған қаптамасы да босап тұр. Және аяқ асты жел тұрып, оның да жан-жаққа ұшпасына ешкім кепілдік берген жоқ. Ал, кеше құлаған үйдің сылағы мен пеноплексін бүгін түске таман жұмысшылар келіп, жинап алып кетті. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!