– Е, айқайламашы болды ей!

– Қалай айқайламайсың!!!

Жол апаты бола салысымен, жұрт кінәлі жүргізушіні емес, дәрігерлерді жерден алып, жерге салып жатыр. Айтуларынша, ақ халаттылар қансыраған кісіні жедел жәрдем көлігінің ішіне жатқызып қойып, оны ауруханаға жеткізуге еш асықпаған.

-Өлсе, басыңмен жауап бересің!

Жұрттың айқайынан соң дәрігерлер жаралы азаматты ауруханаға әкеткен. Алайда, 43-жастағы такси жүргізушісі жарты жолда көз жұмды. Марқұмның жесірі енді жылдам қимылдаудың орнына, жүріп алған жедел жәрдем қызметкерлерін сотқа бермекші.

Гүлмира Дүйсенбаева, марқұмның жесірі:

- Уколын салған да, машина ішіне кіргізіп, есігін жауып кеткен. Сол машинаға салғаннан кейін апару керек еді. Мүмкін тірі қалар ма еді. Шамалы бір сағат болса да көретін едік қой.

Ал жедел жәрдемдегілер өздеріне шаң жуытар емес. Айтуларынша, оқиға орнына жіберілген бригада жол апатынан жараланғандардың бәріне бірдей көмек көрсетуге міндетті. 

Ғалия Нұрсейітова, Қызылорда облыстық жедел жәрдем станциясы бас дәрігерінің орынбасары:

-Жол-көлік оқиғалары кезінде іс-қимыл алгоритмі бар. Сол алгоритм бойынша жол-көлік оқиғасы орнына бірінші барған бригада сортировка жасайды. Бұл фельдшердің жасаған сортировкасы дұрыс деп есептейміз. Себебі, ол бірінші ең ауыр науқасты алып, машинаға салып, оған көмек көрсеткен. Себебі, одан басқа да 3 науқас бар ол жерде.

Сөйтіп, бірінші жеткен бригада келесі көлікті күтіп жүргенде уақыт созып алған. Ал жол апаты мына Мерседес мінген жігіттердің кесірінен болыпты. Жаңа төселген асфальттің үстімен жарысқандар, бұрылыста тұрған таксиді соққан. Сөйтіп оны сүйрелеген бойы келесі көшедегі Ішкі істер департаменті ғимаратының алдына барып бір-ақ тоқтаған.

Абылайхан Оспанов, оқиға куәгері:

-Қайта-қайта аварийкасын жақты.  Қасындағы машинаға жарысайық деп белгі берді. Сосын  екеуі жарысты.

Алайда жылдамдықты асырғандардың оңай құтылатын түрі бар. Өйткені, екі бірдей Мерседестің жарысқанын көргендер болса да, полицейлер абайсызда болған оқиға деп іс қозғаған. Сотқа дейінгі тергеуді бастағандар тіпті жүгінсіз жүргізушілерді қамаққа да алмаған. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!